من شاف بلاوي الناس

- إيناس الدغيدي عقبال أملتكوا كده بتحج السنادي و وقفت على عرفات علشان تقول يا رب وفقني أخرج أفلام أكثر سفالة لما أرجع و ألبس لبس مالوش لازمة... بتشجيع من الاخت الصديقة المقدامة يسرا!!!!!

و الله فكرة أوريجينال يحتفلوا براس السنة هناك... حاجة كده زي جلابية بارتي... و بتقول إنها مش هتلبس الحجاب ... هي مجرد رايحة تؤدي واجب من الواجبات .... طب هي معرفتش إن الواجب ده ليه أصول و قواعد وليه نتايج

و حاجات تانية كمان... بمعني اللي بيروح يحج بيحج علشان يرضي ربنا... بيحج علشان يكفر عن ذنوبة و يرجع كيوم ولدته أمه... يعني خسارة تضيع الحجة الوحيدة الفرض و ترجع تسودها تاني... يعني خسارة تضيح حق حد تاني أولى بالحجة دي علشان سيادتها تتمنظر بحجة مالهاش معنى بالنسبة ليها إلا إنها مجرد ركن واجب

أكيد مش من حقي أحجر عليها او على تصرفاتها و الهدى ممكن ييجي من عند ربنا في أي لحظة... بس سامحوني ... كلامها مستفز



- صدام حسين... تم تنفيذ حكم إعدامه في فجر أول يوم عيد الأضحى.... يا ترى اللي بيضحي علشان ماما أمريكا ده نقول عليه إيه؟؟؟؟

و بالمناسبة.... أمريكا طلبت تسلم متعلقاته الشخصية!!!!! هتتباع في أي مزاد و بكام... طب بأي حق!!!!!!!!



- العيد (فرخة) للفقير.... و ياريته يحصل كتكوت حتى......



- من زمان و نفسي اعلق على الموضوع ده... عمرو دياب ... إشمعنى!!!

يتقال عليه المطرب العالمي... و ماله علشان جايزة الميوزك أوورد.... بالرغم من إن معظم ألبوماته و خاصة الأغاني اللي قام بتلحينها كلها ماشية على وتيرة واحدة.... لا أعتقد إن أغنية واحدة في الألبوم تنجح تعمل مطرب عالمي... و إلا كده نعتبر سعد الصغير مطرب عالمي بالثلث بأمارة العنب... طب إليسا جايزتين في سنتين ورا بعض في الميوزك أوورد ميتقالش عليها مطربة عالمية ليه؟؟؟؟

طب حكيم اللي غني في حفلة توزيع جوايز نوبل في السويد... مجرد مطرب شعبي؟؟؟؟؟

وهل المطرب (الشاب) علي الحجار و المطرب الشاب جدا هاني شاكر هيتحفونا بأغنية شبابية جديدة؟؟؟؟

دي حاجة تقرف

هدية العيد

مرض جنسي جديد كمرض الايدز قد ينتشر في اسرائيل

تتناقل وسائل الاعلام انباء عن ظهور مرض جنسي جديد من شأنه ان يتفشى في اسرائيل
. ويعرف المرض الجديد باسم " تروبيكال بوبو " ..... باقي الخبر

كل عام و أنتم بخير

مااااااااااااااء

المؤمن للمؤمن كالبنيان المرصوص ... تضامنا مع المدونين التونسيين

توت ولا بلوط

iTootكلنا طبعا عارفين مجمع التدوينات
ومعظمنا عارف إنه مجمع شخصي أكثر من ان يكون مجمع عام يعني اللي عنده واسطة هو الوحيد اللي يقدر يضيف مدونته فيه أما باقي الطلبات فيتم تجاهلها تماما ... ولا الهوا يعني
GreenDataتذكروا الحملة في مدونة

الخبر الجديد (مش جديد قوي بس لسه مكتشفاه) محاولة لعمل مجمع تدويني
iBaloo6 بإسم

أنا متأكده إنه هينافس بكل المقاييس نظرا لحالة الضيق الشديدة اللي أصابت ضحاياه بإحساسهم بالنبذ من قبل إدارة شجرة التوت... لأن كل واحد مننا مبدع بشكل من الأشكال... و ليس هناك مقياس فعلي للإبداع

والظريف إن أعضاء شجرة التوت أصابهم الهلع فبدأوا بحملة منافسة و حسب ما فهمت إنهم هيسمحوا للناس اللي تم رفضهم!!!!

الواقع اللي لازم كلنا نؤمن بيه و أولنا البشوات أصحاب توت إنها مجاتش على شجرتهم فعندنا مجمعات تانية زي:
Egyblogs
Tadween
Dawwen
و بيعملوا بكفاءة تامة و مش هتفرق معانا أي مجمعات أخرى

و أعتقد إنه من الخطأ إننا نفرح بقرار شجرة التوت بالسماح!!! لينا بإضافة بلوجاتنا مرة تانية... أظن دي محتاجة مقاطعة تامة ليهم لأنه ماكان من الأول يا بشوات
لأ بجد ميرسي ليهم... هيتفضلوا علينا بحسنة... و حسنة قليلة تمنع بلاوي كتيرة .... عن توت طبعاُ
لكن عموما أعتقد فكرة فكرة موفقة... من نوعية بلاها توت خد بلوط
و في النهاية كله بيتزرع

--ooOO@OOoo--

وعلى هامش الموضوع ده لازم ناخد بالنا من نقطة
إن اللي بيحصل في توت ده مجرد نموذج للي بيحصل في مجتمعنا عموما
بمعنى... اللي بيحصل في توت هو اللي بيحصل في حكومتنا
و أسلوب تصرف توت هو نفس اللي بيعمله حكامنا ووزرائنا
يعني يا جماعة أي واحد فينا ليه منصب إداري أو بيرأس حاجة
غالبا ما بيتصرف بإسلوب حسب وجهة نظره بس و بالتالي ده بخلق إعتراضات كتيرة

أكيد كلكم أعضاء في منتديات و شفتوا اللي بيحصل من الأدمنز و الموديريتورز لما بيمسكوا منتدى
بالرغم من إنهم بيبقوا أشخاص عاديين جدا في حياتهم و مع الناس ولو كان حد فيكم بيعرفهم قبل ما يمسكوا المنتدى أكيد هيستغرب اللي بيعملوه بعد ما بقى المنتدى في إيدهم

حقيقي نفس اللي بيحصل في البلوجات.. فكل واحد بيمسح التعليقات اللي مبتعجبوش
بمجرد ما حد فينا بيشعر بالقوة أو بالأهمية في مكان ما أو وضع ما كل حاجة بتتغير
لازم نتعلم الدرس

تصرف حضاري

المصري اليوم



فصول تعليمية في الموانئ لتدريب الحجاج علي وسائل الإنقاذ

وزارة النقل بدأت في إنشاء فصول تعليمية داخل صالات السفر والانتظار
بموانئ البحر الأحمر، لتعليم الحجاج كيفية التعامل مع وسائل الإنقاذ
والنجاة، وقد تم توزيع كتيب علي الركاب يتضمن عدداً من التعليمات لضمان
أمن الركاب وسلامتهم، منها تحديد أماكن أطواق النجاة وطريقة استخدامها
وطفايات الحريق

وقائمة المعدات والأدوات المحظور علي المسافرين اصطحابها معهم، وأكد
المهندس محمد منصور وزير النقل أنه بدأ في تنظيم الفصول التعليمية بموانئ
«سفاجا، السويس، نويبع، الغردقة، بورتوفيق، وهي موانئ سفر المعتمرين
والحجاج، مشيراً إلي حرص الوزارة علي تحقيق أمن وسلامة المسافرين.

أعتقد إن ده تصرف حضاري... بستغرب ليه محدش علق على الخبر ده

ولا إحنا شاطرين نطبل و نهلل للخطأ و منعرفش نقول للصح برافو

مجرد تساؤل

جبتوا الموبايل أبو كاميرا؟؟؟

مبدئيا الموضوع اللي هتكلم عنه يمكن مش جديد بالنسبة لكم و لكن الجديد فيه المستوى العمري اللي وصل ليه
الموبايل و مصايب الموبايل بالكاميرا
زمان كنا نسمع عن الأفلام اللي بتتصور من ورا مرايات غرفة البروفة في المحلات
دلوقتي الموبايل حل كل المشاك
فأختي مدرسة في مدرسة ثانوية خاصة و في محافظة تعتبر من أكثر المحافظات تمسكا و إلتزاما بالأخلاقيات إلى حد ما إلى الآن و ده طبعا لا يمنع وجود خفايا كثيرة

كانت أختي في إحدى الحصص و ضبطت أحد الطلبة (فصل أولى ثانوي) منشغل عنها فما كان منها إلا أن ذهبت لترى ما في يده و كان الموبايل فأخذته منه و بعدما شعرت بقلق الفتى منها وعدته بإعطائه الموبايل في آخر اليوم الدراسي
وبفضول الأم و الأنثى والمربية والذي تسبب فيه رد فعل الفتى المبالغ فيه فتحت الموبايل لتستكشفه و إن كنت لا أقرها على ذلك
وتحكي لي أنها رات ما لذ وطاب و خاصة اللقطات التي أخذها الطالب لزميلاته البنات أو لفتيات في الشارع و هي لقطات أخذت بالطبع على غفلة و في أوضاع لا نتخيل الذهن المريض الذي ينتظر ليتصيدها و لأجزاء و مناطق حساسة (و بدون ما البنات تاخد خوانه)

و الأبناء يطلبون من الأب الموبايل و الأب يقولوا من عنيا يا حبيبي آخر موديل هو يعني إبن فلان أحسن منك
و مبقاش فيه مشكلة المتاجرة في أعراض البنات و اللي مش عايزة تمشي في الغلط هيبقى سهل إجبارها... دلوقتي بقى سهل لو واحد عايز نمرة موبايل واحده يجيبها من صاحبتها و حصلت يعني بلا مبالغة
هو ده جيل مصر القادم ... لم يصبح الامر أن الشاب يختار طريقه بعد أن ينضج ما بين الجد و الضياع
وإنما الدش و الموبايل و الأنترنت حددوا لهم الطريق من البداية
و ربنا يستر على أولادنا

النووي لعبة في إيد عيل

نشر 5آلاف جندي على الحدود مع غزة.. و مخاوف من إستخدام إسرائيل للنووي



نفسي أعرف العبقري اللي بيجيب العناوين المتفجرة دي

إذا كان اللي بيتكلم مجنون فامستمع عاقل

إتكررت كتير كلمة الخوف من إستخدام إسرائيل النووي على حدودنا!!!

هو السلاح النووي ده شكة دبوس... طب حد عنده فكرة عن تأثير السلاح النووي على البيئة و قطر المساحة اللي بيأثر فيها...

و يعني إستخدام أسلحة تكتيكية محدودة لتدمير المنطقة الحدودية

أظن يعني مبالغة حبتين... ماهو لو كان ده في إيديهم كانوا عملوها من زمان ده غير إنهم مش هيقدروا على تأثيرها سياسيا أو بيئيا بعد كده... نووي يعني نووي و إلا مكانش حد غلب...

تفتكروا الإسرائيليين فيهم غل كبير لدرجة إنهم يضحوا بنفسهم علشان يضربوا كام نفق على الحدود بالنووي

كفاية مبالغة و إختراعات

لو الكلام ده كلام الموقع أو المراسل فده جهل بين و بكده يفقد الموقع مصداقيته

لو الكلام ده تصريحات مسئول أضف للجهل و عدم المصداقية : هو إحنا بقينا ورا من شوية

كفاية مبالغة و إختلاق أزمات و جعجعة على الفاضي ... قرفتونا

عودة المد و الجزر

أمر بحالة من فقدان الإهتمام بهذا العالم ...

الإنترنت أصبح مصدر ملل بدلا من التسلية و بالرغم من كل المحاولات للإستفادة ولكنها محاولات فاشلة

المدونات أكثر إستفزازا ووأصبح المدونون لا يفرقون بين الغث و السمين...

موضة و بدأت في الإنحدار...

الأخبار أكثر قتامة من السماء المحجوبة بالسحب الممطرة....

الفتيات أكثر بجاحة و الشباب أكثر بذاءة بحجة التمدن و التطور و الإستقلالية....

أشخاص لا تعرفهم يهاجمونك و كأنهم نساك...

و حروب حول العالم لمطامع بشرية بالرغم من أنها ستنتهي في الطين...

و تصريحات الشهرة لا تنتهي بالرغم من مخالفتها لكل عرف و دين....

إنقلبت الأوضاع بشكل سريع في وقت قليل و الإعتراضات تموت بكل سهولة مادام ال(سنيد) يحيا

أكره هذا العالم بوجهه القبيح بكل حقارته و إزدواجيته

وأحب زوجي بكل رقته و حنانه فهو القادر على إحتواء كل هذه المشاعر بداخلي

وقفة مع النفس

مفيش أسوأ من إنك تخسر صديق لسبب تافه

أو إنك تتسبب في جرح إنسان بسبب جرحه لك

أو أنك تبيت ليلة و شخص ما واخد على خاطره منك

مفيش أسوأ من تأنيب الضمير حتى لو إحساسك بيأكدلك إنك ليك حق و مش غلطان

مفيش طريقة ممكن تخرج بيها من المطب ده إلا إنك تعيش وحيد

لأن مفيش إنسان يقدر يقتل ضميره وخاصة لو قلبه زي صفحة الماء لا يثبت عليها شائبة



المضحك في الأمر إنك مبقتش تعرف أساسا هل إنت صح ولا غلط

أما الأسوأ إنك بتفقد إحترامك لنفسك لعدم تمسكك برأيك



أحيانا بتسائل لما يقولوا على شخص إنه ضميره ميت

بتسائل إزاي قتله!!!!

طب اللي معندوش ضمير يا ترى إتولد من غيره؟؟؟؟

طب إزاي ناس بتتخاصم و ميهمهاش و بتجرح أكتر في بعضها

إزاي محدش شفته لحد دلوقتي بيعتذر لإنسان مخطيء فيه

إزاي نتجنب الألم.....

طب لو حد يعرف يكشفلي السر

البعد أحسن

أجازة إلى أجل غير مسمى

مفترق طرق

تعبت من التعامل مع الناس بذوق و بالرغم من كده بتأذي

تعبت من إفتراض الحسن دايما في اللي قدامي و أكتشف إن اللي قدامي مستني غلطه

تعبت من الناس اللي حافظه و مش فاهمة

و تعبت من الناس اللي سايباها سداح مداح

تعبت من الناس اللي معندهاش أي مباديء إلا نفسي نفسي

وتعبت من الناس اللي محبكاها لدرجة التطرف

تعبت من كوني في الوسط دايما

يمكن لازم أتجه لأحد الاطراف بس لو لي الإختيار في إتجاهاتي هاتجه لفوق

بجد بجد .... بلا نيله

في البلد

أصد بعض المثقفين المصريين بيانا يوم الاثنين لمناصرة فاروق حسني وزير الثقافة بعد الحملة الموسعة التي إثيرت ضده من كافة الاتجاهات في أعقاب تصريحات الصحفية والتليفزيونية ضد الحجاب.



وذكرت صحيفة "الوفد" يوم الثلاثاء أن البيان شدد على أن هناك قوى سياسية دأبت مؤخرا على التحدث باسم الدين باعتبارها وصية على الإسلام ومحتكرة استنباط الأحكام الشرعية ، لتحقيق أغراضها السياسية.



ومن أبرز الموقعين علي بيان نصرة وزير الثقافة المخرج يوسف شاهين وصلاح عيسي والدكتور حامد عمار وتوفيق صالح ويونان لبيب رزق وسعد أردش وعمار الشريعي.

إضافة إلى الشاعر سيد حجاب والمؤلف لينين الرملي والسفير عبدالرؤوف الريدي وعدلي رزق الله وعطيات الأبنودي وعبدالهادي الوشاحي وعدلي رزق الله وأحمد نوار.

المدهولين في إزدياد و ربنا يخليلهم ماما امريكا.... تساؤل بس والله مش طائفي بس بقت حاجة تحرق الدم

هو الجماعة المسيحيين مالهم و مال الحجاب؟؟؟؟؟

شكلها هتبقى حرب لأن العملية مش بتتلم لأ دي بتتطور



عجبني قوي اللسعة اللي في البلد النهاردة أيضا و اللي بيقول:



وائل الإبراشى يحاكم بتهمة الإساءة للقضاء،

إبراهيم عيسى بتهمة
الإساءة للرئيس،

طلعت السادات حوكم بتهمة إهانة الجيش.

فهل عقوبة فاروق حسني
لإساءته للإسلام هى الاعتكاف وطلب الإعتذار له؟!



وبما أن طبقة "المسئفين" دخلت في الموضوع ممكن أتسائل

إيه دخل حرية الرأي في الهجوم على الأديان عيانا بيانا

ممكن نقول إن من حقي أكره النقاب مادام في بيتي

لكن أخرج و أقول لواحدة منقبة في وشها أنا بكره النقاب و بالتالي إنتي متخلفة؟؟؟؟؟

هل ده يندرج تحت حرية الرأي ولا قلة الأدب؟؟؟؟

ده تخطي سافر جدا لحدود الأدب و اللياقة و الإيتيكيت فما بالك بحدود أكبر و أهم و هي تعاليم دين

ولو الكلام ده جه من واحد دنماركي هنقول ليه حق لأنه مش فاهم و بياخد بالشكل في بلد كل اللي يهمها بيع أجساد النساء ببلاش

لكن في بلد دينها الرئيسي الإسلام و اللي إتكلم فيها واحد مسلم اعتقد ده هبل و وقاحة لا حدود لها

وخاصة إذا كان هذا الشخص مثير للجدل لأسباب كتير سمعنا عنها ولكن مش هندخل في هذا الإتجاه لأنه لم يثبت أي شيء بشكل قاطع

وهو طبعا حر مادام مش بيجاهر بيه

للرسول عليه الصلاة و السلام حديث معناه:

"إن أشد الناس عذابا يوم القيامة المجاهرون"

يعني الأشخاص اللي بتجاهر بما هو يخالف الدين

طيب... نتكلم في كلمته بإن أمهاته مكانوش بيرتدوا الحجاب و بيعملوا و يدرسوا

أنا بسأل هل معنى كده إن مرتديات الحجاب معاقات ذهنيا زي ما حسين فهمي إدعى ولو كده ليه معظم المتفوقات علميا محجبات؟؟؟

طب ماهو في نفس زمن أمهات سيادته كانت الدعارة منتشرة في مصر عيني عينك و الكازينوهات و الملاهي الليلية و الخمور بردو عيانا بيانا وبردو الستاتا كانوا قالعين عيانا بيانا

هل كانت مصر وقتها من الدول المتقدمة؟؟؟؟

تساؤلات تحتاج لإجابة

---------------------



حاجة حصلت النهاردة مش عارفه سببها إيه و مالهاش علاقة باللي فات

مر من فوق بيتي النهاردة خمس طيارات هيليكوبتر عسكرية

و شفتها بتنزل في قيادة المنطقة الشمالية العسكرية

واللي اعرفه إن الطيارات الهيليكوبتر العسكرية مش بتتحرك كده بكل سهولة و لازم يبقى فيه موضوع كبير بيحصل

يا ترى خير اللهم إجعله خير

Technorati Tags: أزمة الحجاب في مصر , فاروق حسني

يا حرااااااااام

في موقع في البلد:

المصري اليوم: مبارك رفض إقالة حسني .. وترتيبات لدفعه للإعتذار!

فاروق حسني يعتكف في منزله ويطلب من مجلس الشعب رد اعتباره!

تواصل الضغوط على الحكومة من أجل إقالة فاروق حسني

160نائبا يقدمون مذكرة بطرح سحب الثقة من فاروق حسني

مفتي السعودية ينتقد فاروق حسني بسبب تصريحاته بشأن الحجاب

فاروق حسني : الحجاب زي طائفي .. حسين فهمي : المرأة المحجبة "معاقة"!

بخصوص إعتكافه ذكر التالي:
هدد فاروق حسني وزير الثقافة بالاعتكاف في منزله وعدم الذهاب إلى مكتبه بالوزارة أو مجلس الشعب لمواجهة لجنة برلمانية تم تشكيلها لبحث تصريحاته الأخيرة بشأن الحجاب ، في حال لم يرد المجلس له اعتباره!

وانتقد حسني في تصريحاته لموقع قناة "العربية" على الإنترنت يوم الثلاثاء استنكار أعضاء مجلس الشعب عن الأغلبية والمعارضة للتصريحات التي أدلى بها ، والتي قال فيها إن ارتداء المرأة للحجاب يعد "عودة إلى الوراء" ، وأنه زيا طائفيا يهدد سلامة الوحدة الوطنية.

وزعم حسني أن النواب حولوا ما وصفه بأنه قضية "رأي" إلى قضية "قمع" ، مضيفا : "أنا معتكف في منزلي ولن أذهب لمجلس الشعب أو لمكتبي في الوزارة ، إلا بعد رد اعتباري من المجلس لما أثاره ضدي أمام الملأ".

وحول سبب عدم حضوره الجلسة الافتتاحية للدورة البرلمانية الجديدة أكد وزير الثقافة أنه كان ولا يزال مريضا ، نافيا ما تردد حول طلبه من وزارة الداخلية تشديد الحراسة حول منزله خشية تعرضه لمحاولة اغتيال.

وأضاف أنه لن يجيب مجلس الشعب في طلبه المثول أمامه لمواجهته بتصريحاته إلا بعد رد اعتباره ، حيث قال : "عليهم أن ينسوا ذلك إلى أن يعطوني رد اعتباري أولا .. وبعد ذلك سأذهب لأواجههم وأواجه مائة مثلهم"!

وجدد الوزير رفضه الاعتذار عما بدر منه من تصريحات ، قائلا : "الاعتذار مشطوب من قاموسي تماما .. لن اعتذار لأنني لم اقترف شيئا يتطلب مني ذلك"!

وكانت الكتلة البرلمانية للإخوان وعدد كبير من نواب مجلس الشعب عن الحزب الوطني والمستقلين والمعارضة قد طالبوا الوزير بالاعتذار للشعب المصري عما صدر منه ، وانتقد الدكتور أحمد فتحي سرور رئيس المجلس تصريحات حسني ، مشيرا إلى أن الوزير شخصية عامة بحكم القانون لا يحق له التعبير عن رأي شخصي مخالف لمقتضيات منصبه ، وإذا أراد ذلك فعليه أن يتخلى عن موقعه.

وكان سرور قد أمر بإحالة طلبات الإحاطة المقدمة من النواب بخصوص هذا الموضوع إضافة لرسالة الوزير المقدمة إلى المجلس إلى لجنة مشتركة من لجنة الشئون الدينية والأوقاف وحقوق الإنسان لمناقشة التصريحات

شفتوا البجاحة !!!!!!!!!!!

في مصراوي:

مبارك يرفض اقتراحاً بإصدار قرار بمنع النقاب

وزير الثقافة:رأيي في الحجاب لا يجعلني كافرا

فاروق حسني: لم اتحدث في أمور دينية ولم اتكلم في أركان الإسلام...استمع

وقفة تحية

أذكروا لي الفرق بين الرد التالي (مع العلم أنه تكرر لما يقرب من 11 مره):
ممكن اعرف ليه حاطين إسم الدكتورة سعاد صالح معاهم... ده يدل على إنكم متخلفين... إولعوا بجاز... جتكوا القرف مليتوا البلد
وبين الرد التالي:
جزاكم الله خيرا أخوتي . أعترض على وضع اسم الأستاذة سعاد صالح .. فالأستاذة على علم و فقه لم نبلغه. صحيح أني أخالفها في رؤيتها الخاطئة و اشمئزازها من النقاب .. و غير ذلك من الآراء الشاذة ، لكن يجب احترام من يحمل العلم - و لو أساء و أخطأ. برجاء حذف اسمها و السلام عليكم و رحمة الله و بركاته

أظن كان ليا الحق أعنِد و أرفض إزالة الإسم و كمان أرد ببوست مخصوص على الرد الأول فيما يستاهل الرد التاني تحية و إحترام لصاحبه أو صاحبته: باب البحر لإلتزامه/ا الكامل بأصول الحوار المتحضر و الادب مع أنه/ا ليس/ت مضرا/ه (للرجاء) والنتيجة إزالة الإسم كما طلب/ت مع التحية ووافر الإحترام و الشكر

عرفتوا ليه الإنسان بيتفاعل مع المؤثرات مهما كان محترم او صبور على البلاء... لأن في ناس بتستفز بدون محاولة مبدئية حتى لإحترام الطرف الآخر بتبدأ في الهجوم و بالتالي الهجوم بيبقى رده هجوم مماثل فما نحن سوى بشر في النهاية ولا نرضى لأنفسنا الإهانة

و أود أن أشيد بشخص آخر وهو كمال الشاذلي بغض النظر عن إتجاهاته السياسية او منصبه فانا لم أهتم بمعرفة الشخصية من قبل ولكن لقوله أنه يفتخر بان كل نساء عائلته محجبات و هذه شجاعة ادبية منه يستحق عليها وقفة إحترام و تقدير لعدم إنسياقه وراء اللوثة التي أصابت البعض

ضحكتيني يا إقبال و مكانش ليا نفس أضحك

الكاتبة الكبيره قوي أصابتها العدوى فقالت أعمل كتاب عن الحجاب أنا كمان إشمعني الكل يفتي و انا لأ

قوم إيه.....
قوم إستضافوها في القاهرة اليوم... والله عمرو أديب ده يستاهل جايزة... أصله بيجرسهم واحد ورا واحد
المهم سيادتها "قرأت كتير في الدين" ما شاء الله الست بقت ... خبورة ولامؤاخذه في الدين و قررت تفتي
لكن إن جاء العيب من أهل العيب ميبقاش عيب على رأي حكماء أجدادنا... ربنا يبشبش الطوبة اللي تحت روسهم
إقبال بقى ياخوانا بتقول إن "ليضربن بخمرهن على جيوبهن" معناها كدا إسمالله عليكم حتة قماشة كده مالهاش لازمه و تغطي فتحة البلوزة طبعا مش مشكلة تكون فيه حاجة ظاهرة لزوم إلا ما ظهر منها
و سيادتها بقى ربنا يزيدها مفكرتش في الذنب اللي ممكن تشيله بناء على فتاويها لما واحدة تشيل الحجاب لأنها بكل بساطة صاحبة علم و أدب و "سئافة" ومينفعش تكتم علمها عن الناس و إلا ضلوا يا حرام من فتاوي الشيوخ اللي ب 3 مليم

و نقول إيه الله يسامح قاسم أمين لأنه معملش حساب تطورات الزمن اللي أكدت حديث الرسول واللي بيقول فيه عليه الصلاة و السلام ما معناه:
يأتي زمن على أمتي ينطق فيها الرويبضة
قالوا وما الرويبضة يا رسول الله
قال : السفيه يتحدث في أمور العامه

Peace at last

At Last
I hate fighting or arguing
I hate it when I have to hurt someone because I was hurt
I'm not a mean girl & I'll never be
So please never ever hurt me

إتق شر الحليم إذا غضب

أكيد كل من سيقوم بالتعليق بدءا من الآن سيلاحظ إختفاء الشات بوكس و عمل كنترول على الكومنتس
للأسف يا جماعة مازال فيه ناس جاهلة بالآداب العامة للتعامل بحجة حرية الرأي و فكرة الرأي الآخر
مع إن معلوماتي إن مخالفة الرأي لا يعطي الحق بتعدي الحدود و قلة الأدب

مازال هناك عيال سارحة في أزقة التدوين و لسه بتاخد مصروفها من اهلها و فاكرة إنها لما بقى ليها بلوج على النت خلاص ده أعطاها الحق بالسب و الإهانة و قلة الأدب
و ناس تدعي الفهم
وناس فاكرة نفسها من المفكرين العظماء
وناس مش محترمة خالص، مبتحترمش نفسها فمابالكم باحترام الغير

وللعلم أنا لا منقبة ولا لابسة إسدال ولا حتى عباية ولا لابسة بنطلون خليع و بدى مبين أكتر مما يستر
أنا إنسانة عادية جدا وفي الوسط تماما و الحمد لله في حالي و زوجة راجل محترم في حاله بردو
ولا لينا في قلة الأدب و لا السفالة و لا نستطيع التعامل مع هذه النوعيات من الحثالة
وليس في النهاية لقليل الأدب لدينا إلا جملة واحدة
حسبي الله و نعم الوكيل

ملحوظة اخيرة ليك يا أخينا (مزمز أو موزة )..... أنا لما مسحت تعليقات سيادتك المحترمة قوي بالرغم من إني قلت مش همسحها ده لأني أصبت بالقرف و الغثيان و لم أرضى لأصدقائي أن يقرأوا مثل هذه القذارة و ينحدروا لهذا المستوى للدفاع عني لمعرفتهم بي مش علشان أثبت إنك صح ولا لأني جبانة ولكن لأني أحترم نفسي أكثر منك بكثير

و يا ريت تقرأ الخبر ده ما دمت سياتك بتفهم قوي و بتقرأ قوي وحاول تشغل الفهامة بعيد عن الدهن اللي مغطيه

شكرا منة الله

نسمة أمل - منة الله لم أتعرف عليها إلا عندما بدأت حملة اتنيل ضد كل مدهول
تفضلت مشكورة بعمل بانر للحملة و ربنا يكرمها آمين بالخير دايما



البانر بصراحة حلو قوي ... شكرا يا منة

وعادت الكلاب تعوي!!!!! كما ذكر في موقع
Filbalad

دايما يكسب Google

عايز تعمل ويب سايت خاص بيك
عندك شغل خاص صغير و عايز مساحة على النت ليه
عايز تنشر أي حاجة بخلاف البلوج
عايز موقع بمساحة معقولة (100 ميجا) وببلاش
HTML مبتعرفش
محتاج تصميمات جاهزة
جوجل بيقدملك خدمة جديدة
Google Page Creator
مش بقولكم جوجل يكسب

توضيح و معلومة

جائني رد في التدوينة السابقة فيه شبه إتهام بمعارضتي لحرية الإعتقاد و إستخدامي إسلوب غير لائق في الهجوم عندما إستخدمت كلمة إتنيل
مبدئيا أعتقد أن البعض منكم سيوافقني عندما أقول انني لا أهاجم أحدا بدون سبب منطقي و أنني لم أتعدى الخطوط الحمراء في كلامي اللهم إلا قليلا و بشكل لا يشابه تخطي الأخرين للخطوط الحمراء

مبدئيا أنا لم أعارض حرية الإتقاد و لنا ان نتعلم كيف نفرق بين الهجوم و الإعتراض
فأنا هنا أعترض و الحرية تتوقف دائما عند حدود حريات الآخرين و عندما أتخطى حدود حريات الآخرين فيتم وصف ذلك بقلة الأدب و ليس الحرية
وسيادة الوزير لم يكتفي بإعتناق مباديء ما و إنما هاجم مباديء الآخرين و هنا تخطى الحدود و دخل في نطاق قلة الأدب

أما كلمة إتنيل فأنا لم أستخدما جهلا كما يستخدمها الآخرين و غنما عن معرفة
فالنيلة هي صبغة زرقاء عرفت في عصر قدماء المصريين و كانوا يصبغون بها وجوههم عند إصابتهم بمصيبة
وللأسف لم أجد ما يعضد كلامي في الشبكة العنكبوتية ولكني متاكده من المعلومة
و اعتقد انني وضحت الىن الفكرة في حد ذاتها
و أتمنى أن يقرأن زوار المدونات أكثر من تدوينة للشخص قبل إتهامه بالخطأ ليعرفوا الشخصية التي ينتقدوها

حملة إتنيل يا مدهول .... كلاكيت تاني مرة

بصراحة يا جماعة ردود الأفعال السريعة دي خلتني اقرر إن ردي هيكون بموضوع جديد

أولا بالنسبة للبانر هحاول أعمله إن شاء الله لكن لو حد تاني عمله مفيش مانع طبعا


الكود

الهدف من الحملة:
قول إتنيل لكل مسؤل أو حتى أي فرد أدلى او كتب تصريحات أو موضوعات منافيه للعقل أو بتدعوا لإلحاد
و التحرر من القيم أو بتهاجم ديننا الحنيف أو رموزه او مفرداته أو المعتدلين من المنتمين ليه أو العائدون بالتوبة إلى الله
وده مش تطرف و إنما المجاهرة بالحق واجب علينا بدون ما نغلط

سيتم نشر صور المشبوهين على جدران البلوجات علشان ميفتكروش إنهم ممكن يعملوا زي تونس لأنه ببساطة مش من حقهم الدعوة لما يخالف الشرائع السماوية أو تقييد حرية ممارسة شعائر الدين
الآن هجوم على الحجاب والنقاب (وإن كنت معترضة عليه) و بعد كده منعنا من الصلاة في الجوامع
وبعد كده منعنا من الإيمان في حد ذاته

Update
عملت بانر كده في السريع
ومفيش مانع لو عندكوا حاجة أحسن لأن انا مش محترفة فوتوشوب
و كمان يا ريت لو تضيفوا أسماء أي شخص ينطبق عليه شروط الحملة
وهنيالك يا فاعل الخير و الأجر و الثواب على الله

MSN & hotmail

هوتميل و شعبيته في إنحدار مستمر... فالياهو و جوجل إستطاعا أن يسبقانه بخطوات رأيت أيضا فيلم دعائي للجيل الجديد من أنظمة ماك او ماكنتوش و كانوا يدعون ان هذا النظام يشبه نظام فيستا الجديد الذي سيتم إصداره هذا الشهر غدا أو بعد غد و التي تعمل مايكروسوفت عليه وهو مازال مليء بالأخطاء فيما قامت شركة ماك بعمله في شهور معدودة بدون مشاكل تقنية!!!
مما إضطر مايكروسوفت لطرح سيديهات و ديفيديهات للنسخ التجريبية لويندوز فيستا لاستعادة شعبيتها المهم إن النهاردة لقيت إيميلي وصل لواحد جيجا 1000 ميجا يعني مع العلم إن مايكروسوفت لما أعلنت عن تحويل كل الإيميلات إلى 250 ميجا كانت الياهو وصلت ل 2 جيجا و جيميل 2600 تقريبا و الجيميل بيزيد كل يوم و انا إضطريت أحول الهوتميل عندي ل 250 بالطريقة اللي إنتشرت في المنتديات بسبب عدم تحويله أوتوماتيك من قبل مايكروسوفت و بالتالي وصوله ل 1000 مش شرط يكون معناه إن كل الناس عندها 1000 أيضا لسبب إني معرفش هل ده معمم أم للخاصة زي ما حصل في ال 250 ميجا

و في النهاية مازال جوجل يكسب السباق

ملحوظة لمن لم يستطع تحميل الكتب الدينية تم تصليح الوصلة و يمكنكم تحميلها من هنا

حملة إتنيل ضد كل مدهول

Filbalad في مصراوي و

إضحك كركر

هذه النكتة إهداء مني لكل معارض لمفتينا الجليل

Bakkouz من مدونة

عزيزتي سوسة المفروسة

عزيزتي سوسة لسة مخلصة قراءة البوست الأخير ليكي
من الآخر مهما الستات إعتقدوا إن الدنيا تطورت ونادوا بحرياتهم المزعومة فلازم يفهموا إن كل تطور يصاحبه إنحدار في الأخلاق و القيم
وكل تنازل الراجل بيقدمه للست قدامه تمن هي بتدفعه غالي و خليها تستحمل مادامت إختارت تتمرد على حياة الأنثى الطبيعية
وإذا كنتي عايزة ترمي اللوم على رجالة الزمان ده فمتنسيش ترمي اللوم كمان على ستاتها و بناتها واللي تلات أرباعهم مش بنات أصلا
و متنسيش إن اللبس عمره ماكان مقياس
يعني مش شرط المحجبات كلهم يبقوا أشرف من الشرف و مش شرط كل بنت مش محجبة تبقى مومس وبالتالي عدم تفرقة حثالة البشر بين محجبة أو غيرها متفرقش
و الكلام ده أشهد عليه عند ربنا و كفاية تطبيل على حاجة إحنا كلنا شركاء فيها
وأيوه الرجالة و الشباب بيبصولنا نظرات ربنا اللي يعلم بيها و تبقى ساذجة قوي لو إفتكرتي غير كده
و إحنا كمان بنبصلهم و إسألي نفسك كده كام مرة قلتي لواحدة صاحبتك الولد ده قمور قوي
ولا كام مرة قلتي على واحد في سرك يخرب بيت حلاوتك
ولو الشاب أو الراجل قال على واحدة دي زي أختي
من الآخر كلمة دي زي أختي يعني محبش أتجوزها لكن ممكن أقلعها هدومها بعيني و مالة ماهو كله ببلاش
و الأهل مبتربيش لأن راجل البيت اللي كان بيعلم و يحكم داير بره يدور على واحدة يصاحبها و ست البيت اللي كانت بتربي بقت عايزة تربية وبالتالي الأولاد لازم ينوبها من الحب جانب
وأيوه ممكن و بنسبة 99% إنهم يكونوا ضاربين أو مخدرين لأن الحشيش و البانجو زي الهم على القلب بس أشري و مليون مين يتبرعلك بيهم كمان مش هيدفعك فلوس و أول المحششين رجالة الشرطة و يجيبوهولك كادو
و لو أي بنت عايزة متهينش نفسها يبقى بكفاية سرمحة في الشوارع بدون حجة و من الآخر و لو زعلتوا براحتكم لأن كلمة الحق دايما بتزعل

حقيقي حرام

بوش يشيد بحكم الاعدام بحق صدام

و قالت أمريكا كلمتها كالمعتاد و كلابها ممن بيدهم السلطة في العراق يتبعون أسيادهم بلا نقاش ولا حتى ....هوهوة

Down Boy Down

Gooooood Booooy

من ضمن تفاصيل الخبر
وكان شخصان قد قتلا واصيب 6 بجراح عندما فتحت قوات الشرطة والجيش النار على متظاهرين مؤيدين لصدام في مدينة بعقوبة بمحافظة ديالى يوم الاحد.

سؤال لواحد فهييم:
أذكر كم عدد القتلى في حكم صدام؟؟؟
مقارنة بعدد القتلى بعد إنتهاء حكمة؟؟؟؟؟؟
!!!!!!

بكره يا ناكر خيري تعرف زمني من زمن غيري
إرحموا عزيز قوم ذل يا همج العراق

نداء

ضربوا الأعور على عينه قال خسرانة خسرانة
و بما إن 3/4 الناس أصحاب المحلات في وسط البلد مش معترفين باللي حصل
والربع الباقي بيقول ماهو بيحصل كل سنة
أسألهم طب نخوتكوا بردو ماتت كل سنه
محدش منكم عمل حسابه لما لقى الوضع بيتكرر علشان يحذر الناس
مادام إنتوا معملتوش اللي عليكم
إحنا هنعمل اللي علينا

نداء لكل بنات مصر
وقت الجد متسكتيش و إقلعي اللي في رجلك و لا يهمك
خلي اللي قدامك يخسر قبل مانتي تخسري
نداء لكل المصريين
قاطعوا محلات وسط البلد
نداء لكل العرب
قاطعوا مصر لحد ما تعرف حكومتها تحمي بناتها
و خليها تخرب أحسن

كلمتين إقرأوهم يمكن ينفعوكم

مجموعة من أمهات الكتب وصلتني على الإيميل... لابد من وجودها في مكتبتكم الإلكترونية

تفسير ابن كثير

تصفح في الموقع

صحيح البخاري
المجلد الأول

صحيح البخاري
المجلد الثاني

رياض الصالحين

زاد المستقنع

بلوغ المرام من أدلة الأحكام

العقيدة الواسطية

الاجرومية في النحو

منظومة البيقونية

الاربعين النووية

ثلاثة الاصول

كشف الشبهات

العقيدة السفارينية

نخبة الفكر

نظم الورقات

مدة الأحكام من كلام خير الأنام

مقدمة في أصول التفسير

ألفية ابن مالك

متن كتاب التوحيد

الفتوى الحموية الكبرى

إضغط هنا للتحميل

ملحوظة: الملف مضغوط ولن تحتاج إلى برنامج لفكه
كل ما هو مطلوب دوبل كليك عليه و تختار مكان وضعه على جهازك
و هو سيقوم بالباقي
ستجد فولدر بنفس الإسم يحتوي على الكتب

I'm Speechless

من كام يوم بفكر في اللي حصل في وسط البلد ... و الحقيقة مش عارفة أقول إيه وخاصة إن المصدر الوحيد للمعلومة مازال مدونة مالك... مش قصدي أشكك في كلامه لكن كل موقف ممكن يتحكي بكذا طريقة فكل يرى الحدث بطريقته وبشكل يختلف تماما عن الآخرين حسب الخلفيات الثقافية و الدينية و الإجتماعية للراوي و لا نستطيع إنكار فكرة تدخل العقل بزيادة أو نقصان من الأحداث مهما توخى الراوي الحذر... فمازلنا كلنا بشر لا أستطيع أن ألوم طرف معين في الموضوع

فلنحلل عناصر الموقف معا توجد عدة أطراف:
مجرم = الشباب المتواجدون في قلب الحدث
ضحية = الفتيات اللائي (ساقتهن الظروف) للتواجد هناك
شهود = من رأوا الحدث من بعيد أو قريب و لم يكونوا طرفا من الإثنين السابقين
متفرجون = و هم الأطراف التي حضرت الواقعة و لم تتدخل من قريب أو بعيد
قضاة = الناس و نحن منهم الذين لم يتواجدوا في المكان و إنما يحكمون على الوضع طبقا للروايات المحكية
مسئولين = الطرف المتسبب في هذا الوضع

المجرم أو المجرمون
من هو المجرم هنا... هل هم أخواتنا أو آبائنا أو أبنائنا أو أقارب لنا أو جيراننا؟؟؟ لو كانوا أحد هؤلاء... هل وصلوا لهذا التردي بدون سبب (لله في لله) أم هم تحت تأثير ظروف معينة هل يعد هذا الحدث فرديا بمعنى أنه لا يتكرر يوميا؟؟؟ سنقول أن من يمتون لنا بصلة ما لا يمكن أن يتواجدوا في هذا الوضع إذن فمن الفاعل... هل هم مجرد غرباء... شباب ضائعين لم يجدوا يمن يعلمهم و يأدبهم... هل هم نوعية معينة من البشر... هل هم حثالة البشر هل تلوم على شاب شاهد إحدى القنوات الفضائية و أعطاه أحد أصدقائه حبة ما ليشعر بالنشوة و بعدها لم يدري ماذا فعل وأصدقائه يعانون من نفس الوضع و جميعهم يتشاركون الخيالات مع بعضهم فتتفجر الأمور لتصل في النهاية إلى هذا الحد السارق... هل يسرق لمجرد السرقة أم يسرق ليأكل؟؟؟ و بعد ذلك أصبحت عادة ولا يجد من يحتويه ليتوقف فقط للتذكير... أطفال في أعمار بين السادسة و العاشرة لا يتوانون عن مد الأيادي على شابات بل و أمهات في الشارع!!!!!!

الضحية.. الفتيات
طبعا كان الله في عونهم بداية لكن لازم أسأل.. متى بدأ هذا الوضع... من الحكايه و إسلوبها فهمت إن عدد المتواجدات في الشارع لم يكن كبيرا بعكس الشباب حد يقولي هل ده كان اول عيد ولا آخر عيد... بمعنى كثير منا نحن الفتيات تعلمنا بمرور الوقت (وبدون أسباب إضطرارية) أن الخروج في أوقات الزحام كالأعياد و المظاهرات ليس بالتوقيت المناسب.... التأخر في الشارع أيضا ممكن يعطي إنطباعا سيئا عنا و يترك المجال لضعاف النفوس لتخطي الحدود؟ ستذكروني بوجود منتقبات... و أنا أرد هي بقت تفرق بمعنى ليست كل المنتقبات ترتدي النقاب بإرادتها و ليس كلهن يعملن بما قال الكتاب و من الآخر منتقبة أو لا مش هتفرق مع واحد حشاش... بل أحيانا الغطاء الكامل يكون أكثر إثارة للخيال من الآخر محدش يتجنن و يخرج في العيد فمابالكم بالتواجد في وسط البلد مهما كانت الأسباب و ليه منرجعش للأصل و الأصل هو دينا... واللي مقالش نحتفل بالعيد بالخروج... منخلينا في البيت ولو خرجنا نحاول نعمل اللي علينا و نتواجد في مكان مناسب ... ولا إيه؟

الشهود
مش عايزة أشكك كما قلت في البداية في مالك أو غيره... لكن مش معقول إن اللي حصل ده كان أول مره يحص و بردو من الآخر ما حدث في وسط البلد يحدث كل مناسبة في مدن المحافظات الأخرى مثلا حيث يتواجد أهل الريف في المدينة بشكل يصعب فيه الحركة و تمتد الأيادي بدون أن يرى أحد الفاعل.... فالشارع زحام و تستاهل اللي يجرالها من تخرج في وسط هذه الغوغاء ليه بتستغربوا عدم تدخل الأمن... فعليا ليس مصرح للقائم بالحراسة أن يترك مكان حراسته ليتدخل في وضع آخر بدون تكليف من رتبه تفوقه... معاكم إن ده هبل ولكن هذا نظام حكومتنا فأي مجند يخالف الأوامر يتم جزائه و ألف مين يتطوع ليبلغ علشان يكسب كريديت لصالحه يستخدمه وقت الحاجة أنتم قمتم بما املاكم عليه ضميركم و لكن لتواجدكم في هذا المكان بالذات وقت حدوث هذه الوقائع و معرفتكم بأمور التدوين نقلتم الأخبار... أصحاب المحلات ذكروا أن هذه الوقائع تتكرر كل سنه... مين الغلطان هنا؟؟؟

المتفرجون و انا مالي خليني في حالي هييييه هيييييه خناقة.... فضيحة... خبر النهاردة ببلاش بكره هيبقى بفلوس في الجرايد!!!! النخوة ماتت

القضاة
ليكون القاضي عادلا يجب أن يسمع العديد من الشهود و أطراف القضية نحن القضاة.... هل سمعنا من الجميع؟؟؟ لا أعتقد هل سمعنا شهادات مختلفه أم كلها من مصدر واحد.... الرد معروف قبل الحكم يجب ألا ننسى أن هذا الموقف يتكرر في الأوتوبيس و الميكروباص... هذا الأمر يتكرر في مظاهرة أو في أي زحام هذا الموقف يتكرر في الأماكن الهادئة.... هذا الموقف يتكرر في الأرياف... هذا الموقف يتواجد في الأقسام ليس كل لمسة يد تحرش فقط.... بل كل نظرة أو كلمة تخدش الحياء

المسئولين
مش الحكومة لوحدها... صحيح هي مش فاضية تحرس كل مواطن على قدر حراستها للوزراء و الأكابر لكن بردو الموقف ده كان يتمنع إزاي و مين كان يتخيله؟؟؟ يا ترى الحكومة غلطانة ولا أهالي الحيوانات دي؟؟؟؟ ولا حتى الأهل... نفس الإنسان و شيطانه هو السبب... قد يجد التوعية الدينية ولكن نفسه تأبى أن تستمع قد يجد التربية ولكن نفسه أمارة بالسوء قد يتوفر له التعليم و غبائه يمنعه من إستغلال نعمة لا يعلمها.. العلم نعمة سمعت كثيرا عن شباب يوفر لهم أهلهم أفضل الفرص و لكنهم يفشلون... فقط لأنهم لا يرغبون في النجاح... هاتعب نفسي ليه أبويا معاه و مش محتاج أشتغل... طب ده نعمله إيه؟؟؟؟؟؟ يا ترى عرفتوا المسئول؟

أتذكر الرعب الذي كان يصيبني انا و أختي عند الخروج لأي سبب من الأسباب في الفترة الأخيرة قبل زواجنا حيث تعرضنا انا وهي للعديد من المحاولات من أطفال كما ذكرت و حتى شباب بالسيارات و الموتسيكلات و حتى العجل
لن أنسى يوم ان خرجت لصلاة التراويح و كان معظم الناس مالزالوا يستجمعون قواهم بعد الإفطار و جاء هذا الطفل على عجله ليمد يده علي و كانت ملابس غاية في الإتساع من أجل الصلاة!!!!
أعتقد جاء الوقت ليخرج لنا القانون بعقوبة جدية لهذه النوعية من المواقف... فلا يجب ان يضيع مستقبل فتاه لتستطيع الحصول على حقا ويجب أن ينفذ القانون بكل صرامة و لا يتم التفريق بين إبن غفير أو إبن وزير
و إتقوا ربنا فينا.... كفايه بهدله هنلاقيها من رئيس جامعة حلوان ولا ضعاف النفوس من ضباط الشرطة ولا الشباب الواقعين تحت تأثير الكله

أرجع و أسأل نفسي... هو كان لازم تحصل عملية تحرش جماعية علشان نتكلم؟؟ ما حدث ليس بجديد.... يحدث في المترو وقت الزحام.... يحدث في الترام.... يحدث في الاوتوبيس.... يحدث في الميكروباص نظرة من موظف حكومي او شاب ماشي في الشارع ممكن ان تجرد الفتاة من ملابسها بدون مد أيادي
كلمة (أبيحة) من كلام الايام دي و الذي أصبح لبانه في فم كل شاب و من قراءاتي للمدونات وجدتها في فم البنات أيضا!!!! بهدف المنظرة و إرتقائهم لمستوى العصر... مبقاش فيه حياء حتى عند البنات مع إن الحياء شعبة من الإيمان
البنت اللي بتهرج بمد اليد مع زملائها و تقول عادي إخواتي!!!ماهو ده تحرش عكسي أيضا لكن الفرق إن الطرف المتحرش بيه عاجبه ومش هيقول لأ (تحرش ببلاش يعني و على طبق من فضة)
أفلام الفنانين الجدد و الذين يتسلقون السلم بسرعة الصاروخ بقبول أدوار تنافي عاداتنا... ما أقوله ليس بتخلف و لكن التخلف أن ننسى أن لدينا طبقة من البشر تتجاوز نصف عدد سكان مصر في حالة حرمان من كل مباهج الحياة
عندما نصفق لفيلم مثل عمارة يعقوبيان ونتناسى النتائج فأنتم لا تستطيعون إقتصار المتفرجين على أصحاب العقول فقط و لكن شمامي الكله و البانجو ز الحشيش لهم مساهمات عالية في حضور مثل هذه النوعية من الأفلام...
لا تلوما علي غيركم فيما حدث فكلنا مشتركين لأننا لم نقف وقفة أمام الكثير من البدع التي ظهرت مؤخرا بل بالعكس دافعنا عنها لأنها حرية شخصية و حرية رأي و رقي عقلي و ثقافي
الخطأ نشترك فيه جميعا مادمنا لم نقف أمام كل ما يتعارض معنا و تناسينا اننا طلعنا ولا نزلنا مجتمع شرقي ولن نصبح أمريكا أو دولة أوروبية في يوم من الأيام

وحسبي الله و نعم الوكيل

حكمة أجدادنا

"من خرج من داره إتقل مقداره"
مثل لازم أفتكره كل عيد قبل ما أقرر أخرج لأي سبب حتى لو كان لشراء البقالة ويا ريت بنات أحداث وسط البلد كانوا إفتكروه

"حسنة قليلة تمنع بلاوي كتيرة"
مثل لازم كلنا نفتكره قبل ما نقدم مساعدة لحد... للأسف المحتاج طلع مش محتاج فلوس... بل قلم على الوش يفوقه

"لو الكلام من فضة يبقى السكوت من دهب"
"هبلة و مسكوها طبلة"
أكيد لازم نفتكر المثل ده عند قراءة بعض المدونات

"أصلك يرد عليك"
لما بقرأ أو أشاهد كلام صحفيي هذه الأيام

"إكسر للبنت ضلع يطلعلها إتنين"
يا ريييييييييييييييييت مكانش حد إتقرف من اللي بيحصل دلوقتي

"الجنازة حارة و الميت كلب"
" :) الشبشب و القبقاب بقوا أصحاب"
كل ما شوف أنصار احد الأحزاب بيتكلم عن أحد "أعلام" الحزب

"عشمتني بالحلق خرمت أنا وداني"
المثل ده لازم نحطه "حلقة في ودننا" لما يجيلنا صنايعي يعملنا شغلانة في البيت "ويعملنا من البحر طحينة"

"يوضع سره في أضعف خلقه"
لا تستهين أبدا بمن هو دونك في الصحة أو الخلقة أو خلافه

"يا مستعجل عطلك الله"
إفتكرها دايما قبل ما تنزل لمشوار يخصك في الشارع ويا ريت يفكرك تنزل بدري شوية و إبقى قابلني لو وصلت في معادك إلا لو عندك طياره... بس للأسف هتحتار بردو تركنها فين

"يا قاعدين يكفيكوا شر الجايين"
و يا مدونين يكفيكوا شر المعلقين

"الخلف الخايب يجيب لأهله النعلة" (اللعنة يعني)
على كده 90% من أهلنا إتلعنوا

"قلبي على ولدي إنفطر و قلب ولدي عليا حجر"
إرحموا أهلكم علشان خاطر ربنا يا ناس يا هووووه

"واحد شايل دقنه و التاني تعبان ليه"
لمهاجمي الممثلات المحجبات و حياة ربنا سيبوهم في حالهم مش بالذمة مسلسلاتهم أحسن مليون مرة من مسلسلات يسرا و إلهام شاهين!!! واللي يضحك اللي بيقول على مسلسلات المحجبات إنها مؤامرة... حد يقدر يقولي مؤامرة على إيه ولا ليه؟؟؟

"نص البلد ما تعجبني يا ترى أنا أعجب مين"
لهواة النقد الدائم المستديم و كل فيلسوف فاكر نفسه خبير سياسي

"مين فاضي ينبش في الماضي"
لا وربنا ناس كتير قوي فاضيه... فراغ "عاصفي" بقى

"من قال الحمد لله شبع"
"من رضي بقليله عاش"
أهديها لكل من أصاب بالسعار في كل شيء ، فعدم الرضا عن الحال أصبح من أمراض العصر

"كنتي فين يا لأ لما أنا قلت آه"
بيقولها كل عراقي كان ضد صدام .... و يا ريتنا ناخد العبرة قبل "ما تقع الطوبة في المعطوبة" ومحدش يقولي فيه فرق

"فقر بلا دين هو الغنى الكامل"
"اللي معاهوش ميلزموش"
"السلف تلف و الرد خسارة"
والله جدودنا دول كانوا في منتهى الحكمة و بالرغم من كل أمثالهم دي مبنعملش بيها ... و مهما الزمن إتغير و الدنيا إتقدمت الأساسيات و الثوابت واحدة
أقساط= ديون و بلاش منظرة فارغة بالدين

عيدكم مبارك

كل سنة و إنتم طيبين
وللرحمن عابدين
وللقرآن متمين
و في صوم رمضان متقين
و بفرحة العيد حاسيين
وإنتم و أحبتكم متجمعين
وفي حياتكم متهنيين

Better later than never....

Green Data التاج ده تم تمريره ليا من فترة و للأسف مشفتوش غير النهاردة في مدونة
مطلوب مني اكتب 15 حاجة بحبها و أدي اللستة:
1. بحب الكمبيوتر و الإنترنت لدرجة الإدمان
2. بحب التدوين و أصبحت مدمناه بشكل مرضي
3. الشيكولاتة
4. القطط و خاصة الصغيرة لأنها بتحسسني باحتياجها الدائم للحماية
5. الأطفال... دعواتكم
6. القراءة ولو إني معنديش فرصة كبيرة بعد زواجي
7. التصميم و خاصة في الديكور لأنه تخصصي و بما إني مش بشتغل فبمارسه في بيتي
8. المشي... أيضا هواية حرمت منها بعد الزواج
9. السفر و التجوال و إكتشاف الدنيا و مجتمعات أخرى
10. الأعمال اليدوية في أي مجال بما فيها إصلاح الأجهزة الإلكترونية... محترفة مكواة لحام :)
11. سماع الموسيقى و خاصة الهادية (سلو) و الكلاسيك
12. تحميل أفلام دي في دي و مشاهدتها... عندي مكتبة كبيرة من الأفلام :)
13. لعب ألعاب الفيديو جيم المعتمدة على العقل فقط... جربوا سيبيريا وإدعولي
14. التصوير و خاصة بعد ما زوجي أهداني كاميرا ديجيتال
15. إكتشاف أس شيء يخص إهتمامات المرأة و لكن مش إدمان

أمرر التاج للقائمة التالية :
الأميرة أوسا
أحلامي المبعثرة
آخر الحارة
أم العيــال
أيوة خدامة
الصراحة خنقة
جدو
دين و ديناميت
طيارة ورق
فريدة متميزة
كلبـــــوزة
لست أدري
ليــــال
مكسوفة
وعجبي

هل أنت ... مسلم... مسلمة؟؟

طبعا كلنا سمعنا عن واقعة سب بعض الصحف - التي أعتبرها شخصيا من الصحافة الصفراء - لعشرة من الشخصيات الإسلامية و تشمل السيدة عائشة و الصحابي عثمان بن عفان.
أعتقد أن كثيرا منا تعرض في بداية الحديث عن هذا الموضوع للسؤال التالي : هو الناس اللي نشروا الموضوع ده مسلمين.. أو اللي كتبوا الموضوع ده مسلمين؟؟؟!! لو متعرضتوش للسؤال ده بأي شكل أنا إتعرضتله.
ومن هنا خطر في راسي سؤال.... يا ترى إيه تعريف المسلم بالنسبه لينا؟؟؟

هل اللي إسمه محمد؟؟؟
هل اللي مكتوب في بطاقته إنه مسلم؟؟؟
هل الشاب ذو اللحية و بيقتل ضيوف بلدنا لمجرد إنهم بيدينوا بدين آخر أو جايين من بلد حكومتها بتعادينا؟؟؟
هل يا ترى الأخت المنقبة اللي طول الوقت وهي ماشية في بتها مخففة و فاتحة الشبابيك و الناس شايفاها
ولا اللي لابسة الحجاب وشعرها طالع منه و عمالة تقول لجوزها إتقي الله
ولا اللي مربي دقنه و يروح الجامع و في نفس الوقت بيمد إيده على أهله
ولا اللي لابسة حجاب و الله أعلم بحالها واللي هي بتعمله في الخفاء
هل الكاتبة الشهيرة اللي بتفتي بإن الحجاب مش فرض أعتبرها مسلمة؟؟؟
هل الأخ اللي إسمه محمد ولا علي ولا مصطفى لمجرد إنه مكتوب في البطاقة مسلم أعتبره مسلم حتى لو سب الصحابة و زوجة الرسول؟؟؟
هل عبد الله اللي حرم لبس النقاب في سكن جامعته لأسباب أقل ما أقول عنها إنها هبلة أعتبره مسلم وهو بيحلل و يحرم فيما لم يقل الله عنه أنه حرام؟؟؟

هل المظاهر المعروفة تكفي لتعريفنا إنسان بإنه مسلم؟؟؟
طب لما المشكلة دي موجودة عند العالم الغربي و إشتكينا من إلصاقهم الإرهاب بالإسلام بسبب تصرفات همجية من ناس بيدعوا الإسلام و تنفيذ أحكام الله... مش ده يخلينا نبتدي نفكر في كيفية تعريف الإسلام و المسلمين؟؟
أنا هنا لا أتكلم في نقطة التكفير... لكن ميجيش واحد إسمه حسنين يشتم في الدين و في الآخر نقول عنه مسلم
عايزين أحاديث هجيبلكم أحاديث بالهبل تثبت إن 90% فينا مخطئين في حق الدين و ليس من العدل أن ننتمي له
متهيألي آن الأوان نفكر في أفعالنا قبل ما ندافع عن الإسلام

تأكد الخبر

شكرا لعبده باشا حيث أشار إلى مصدر جديد موثوق فيه و الذي نبهني في تعليقه الأخير إلى صحة الخبر الذي يؤكد وفاة العالم الكبير مصطفى محمود
وأعتقد الأسباب معروفة بسبب الخلاف الذي حدث قبل وفاته... وقد يكون عدم نشر الخبر بناء على وصيه له
(الله أعلم)
أللهم ارحمه و ارحمنا جميعا

وبيّن العلامة القرضاوي أن هناك من المسلمين من أنكر فكرة الشفاعة عموما مثل المعتزلة قديما، والدكتور مصطفى محمود -رحمه الله- حديثا بحجة أن الله تعالى لا يقبل المحسوبية، وأن ما عنده هو العدل المطلق، ولكن هذا ليس صحيحا، فالله سبحانه وتعالى عنده العدل المطلق وعنده الإحسان والرحمة والفضل، ولذلك فالمعاملة مع السيئة غير المعاملة مع الحسنة، وقد جاء في الحديث القدسي: «الحسنة بعشر أمثالها إلى سبعمائة ضعف أو أزيد، والسيئة عندي بواحدة أو أعفو»، ويمكن أن تمحى السيئات بالحسنات، ونحن نعتمد في الآخرة على فضل الله عز وجل، فهناك العدل والفضل، وقد أنزل الله رحمة واحدة إلى الدنيا وادخر 99 في الآخرة يرحم بها عباده
المصدر: من موقع القرضاوي

تعقيب

لست أدري وضحت سبب حذفها للبوست بخصوص خبر وفاة العالم الكبير مصطفى محمود
وأنا معاها إن مفيش تأكيد للخبر على جميع الأصعدة
ماعدا في مجلة اليقظة اللي نشرت اللقاء و تذكر فيه أنه لقاء ما قبل الوفاة
وعليه أنا كمان أعتذر لنشر الخبر بدون إيجاد ما يؤكد صحته

بحب الإكتشافات

بحب دايما اكتشف الجديد... حتى لو كان بسيط ومالوش معنى... بالنسبة لي فرحة الجديد زي فرحة يوم العيد اللي كنت بحس بيها و أنا طفلة زمان وخاصة لو فيها روح رمضان و محاولة للقرب من ربنا
مؤخرا قرأت كلام كتير عن إسلام مايكل جاكسون و قعدت أدور على أي موقع يؤكد الخبر ده... لحد دلوقتي لم أجد إلا مقالات من نوعية (يقال) و (سمعنا) و (قرأنا) و (صرح مصدر) يعني من الآخر لا تأكيد رسمي حتى الآن
كتير من الناس هيقولوا إحنا مش عايزين واحد منحط زي ده يدخل الإسلام خاصة بعد نوعية القضايا الأخلاقية اللي إتهم فيها و أنا أذكركم بقول الله تعالى (إنك لا تهدي من أحببت و لكن الله يهدي من يشاء)
و أنا أقول إن الإسلام علي شأنه بالعبيد و الخدم وعمر الإسلام ما كان دخوله بالنقاوة... يكفي إن الإنسان يدخل الإسلام عن إقتناع... وده في حد ذاته نصر و معجزة ربانية... إن الإنسان ينتقل من حالة ضياع و ضلال و يختار الإسلام بكل ما فيه من تقييد لممارسات هذا الإنسان السابقة.
عموما بحثي عن خبر إسلام مايكل جاكسون وصلني إلى أن الأناشيد اللي بيتم إلصاقها خطأ بمايكل جاكسون لا تمت له بصلة و إن تشابه الصوت إلى حد كبير.. و إنما تخص منشد إسلامي من جنوب أفريقيا إسمه زين و يصعب بالنسبة لي نطق إسمه الأخير
ده الموقع الرسمي اللي يخصه و يا رب يعجبكوا

Zain Bhikha
بصراحة حلوة قوي الأناشيد الإسلامية و شيء يفرح القلب المنشدين المسلمين من غير العرب
زي يوسف إسلام و سامي يوسف

البقاء لله

في مدونة سما عمان قرأت الخبر ده
أخوها بيقول لو كانت رقاصة اللي ماتت لقامت الدنيا
عنده حق ما إحنا بلد مش بتمشي غير ورا رقاصة و ماسكين لها طبلة
سؤال بس... ماحنا عرفنا وفاة أحمد زكي و إترحمنا عليه!!!
ماهو الميت متجوزلوش غير الرحمة و إذكروا محاسن موتاكم
جت على مصطفى محمود يعني... ولا هما مستخسرين دعواتنا ليه بالرحمة!!!!
في رحمة الله يا أستاذنا القدير

لينكات صور المجلة من مدونة سما عمان و يتضح فيها الخبر
المجلة إسمها اليقظة و هي مجلة خليجية عريقة... كويتية حسب ما أتذكر
الصفحة الأولى
الصفحة الثانية

إحتفالية مئوية

من فترة و أنا مش لاقية حاجة أكتبها هنا... بس بمراجعة بسيطة على البلوج إكتشفت إني كتبت 99 بوست مع إن الحقيقة كان أكتر من كده لاني حذفت كام تدوينة قبل كده
عموما دي التدوينة رقم 100 وكنت عايزاها تبقى تدوينة إحتفالية :)

التدوين بالنسبة لي كان مغامرة جديدة... أعتقد إني قدرت أخدع نفسي بوجود أهداف هامة و رسالة عايزة أوصلها للناس في البداية علشان أقنع نفسي إني عندي أسباب قوية للتدوين...
لكن الحقيقة إن الاهداف الحقيقية كانت بكل بساطة : تجربة جديدة مغامرة زي ما قلت ... و محاولة لإكتشاف الذات وده بيحصل بعد ما أكتب و أقرأ اللي كتبته وغيرة من المدونين لقدرتهم على إخراج أفكارهم في المدونات في حين إني فاشلة عمليا في التعبير :)

أنا لا أتقن فن الكتابة ولا أعتقد أنني أضفت شيئا بالعكس فأنا تعلمت من المدونين الكثير ..
بحب أعرف و اتعلم و أستكشف... هذه أنا
100 تدوينة و مئات المدونات ومازال هناك الكثير
أصاب بإفلاس فكري أو بسيل من الكتابات
أدخل حارة من جوة حارة لاكتشف المزيد
ليه بحتفل برقم 100 ... معرفش ... انا بحب مضاعفات الخمسة و العشرة و بحس إن رقم 100 ده رقم إحتفالي
بس بردو 100 تدوينة كتير عليا... يا ترى قدرت أقدم فيهم حاجة... لا أظن
يا ترى إيه رأيكوا في المدونة و إيه اللي تحبوني أضيفه أو أحذفه؟؟؟

هل يا ترى إكتشفت حاجة جديدة في التدوين عن نفسي أو عن الناس ؟... الحقيقة لأ مازلت بالنسبة لنفسي ذلك البئر العميق الذي يصعب سبر أغواره.. بكل بساطة أنا برج الجوزاء وهو برج معروف بالتناقض الشديد و تعدد الشخصيات في جسد واحد

أما بالنسبة للناس فده صعب أحدده... أحيانا بأفاجأ بمدونات و أحيانا أخرى أتعجب (لأنني أتعجب) من المدونين و أفكارهم ... ليس بجديد وجود فئات مستفزة من الناس و ليس بجديد وجود فئات أخرى مثقفة... وليس بجديد وجود أشخاص مبدعين و في المقابل ليس بجديد وجود ناس مجرد بتركب الموجة.. وليس بجديد وجود ناس مخهم (قفل مصدي) و في نفس الوقت ليس بجديد وجود ناس لا حدود لأفكارهم والكثير مما لا أتذكره الآن من شخصيات مختلفة..
وده لا ينفي وجود مجموعة متميزة جدا بشكل لم أراه عن قرب في الواقع و سررت بالتعرف على أصحابها

عندما أتذكر بدايتي فأنا أشكر قلم جاف و عبده باشا... فهما أول من زار المدونة و مازالا يتابعانها كلما سنحت لهما الفرصة... و اعتقد وجود من يقرأ في البداية كان سببا في إستمرار محاولاتي
شكرا لجميع من زارني و ترك ولو كلمة واحدة للتشجيع و شكرا لمن زارني ولم يكتب حرفا... يكفيني الزيارة

إقرأ ولا تكتفي بالملخص

في تدوينات سابقة وضعت لينكات لتحميل نسخ بي دي إف من كتب أثارت ضجة وقد يكون البعض لديه الرغبة في قراءتها
Acrobat Reader كل ما تحتاجه برنامج
وهناك برنامج بديل وخفيف ومجاني لا يتجاوز 2-3 ميجا
إضغط على إسم البرنامج للتحميل
Foxit Reader

سأضع لينكاتها مرة أخرى هنا
لتحميل الكتاب إضغط على الصورة

الرجال من المريخ، النساء من الزهرة
في العلاقات بين الرجل و المرأة


بروتوكولات حكماء صهيون
إعرف عدوك


دافنشي كود بالإنجليزية


دافنشي كود بالعربية

هدية

سمعت كثيرا عن هذا الكتاب و بحثت عنه كثيرا حتى وفقني الله لأجده عند أحد المواقع المتخصصة في البيع عن طريق الإنترنت و لحظي كان هذا الموقع يتبع إسلوب الدفع عند الإستلام، وهو موقع سوق النور

والحق يقال فلقد طلبنا الكتاب وبناء عليه وصلتنا مكالمة تأكيد من إدارة الموقع وعرفنا أن الكتاب غير متواجد حاليا و انه جاري البحث عنه إذا أردنا المتابعة معهم... وفعلا فضلنا الإنتظار ووصلتنا مكالمة أخرى بعد فترة ليبلغوننا بتواجد الكتاب.. ولكنه لم يصل .
بعدها تلقينا مكالمة إعتذار و توضيح و قد تبين للشركة أن النسخة التي وصلتهم منسوخة من الأصل و ليست الطبعة الاصلية فقرروا عدم إرسالها... وفي النهاية تلقينا مكالمة أخرى منهم أمس يخبرنا فيها المسؤل المتابع بوصول نسخة خاصة قاموا بالبحث عنها خصيصا لعدم توافر الكم التجاري القابل للتوزيع وقاموا بإحضارها خصيصا من خارج مصر... بصراحة أعجبني جدا إلتزام هذه الشركة معنا وخصوصا أن طلب الكتاب حسب قوانين الشركة لا يستغرق لوصوله أكثر من خمسة أيام و قد إستغرق الأمر الشهر و نصف تقريبا... مما يعني الإلتزام الكامل بتقديم خدمة ممتازة.
تبقى أن اذكر ان هناك مشكلة صغيرة كانت على وشك الحدوث بسبب مسؤل شركة الشحن التي قامت بتوصيل الكتاب وهذا لفت نظرنا كالمعتاد إلى سبب تدهور أحوالنا في مصر فالأداء قد يكون ممتازا إلى أن يأتي عامل بشري يتمثل في فرد واحد و ينسى وضع مسمار فتفقد الشركة شهادة الأيزو!!!

الكتاب الذي أتحدث عنه هو (الرجال من المريخ، النساء من الزهرة) وهو كتاب حقق مبيعات خرافيه على مستوى العالم ومن مقدمة قراتها له فيما سبق تأكدت ان هذا الكتاب يستحق لأنه بسط بشكل غير إعتيادي العلاقة بين الرجل و المراة وحاول فيها أن يوضح كيف ان طريقة تفكير كلا الطرفين مختلفة عن الآخر و بالتالي لا يجب أن يتوقع رد الفعل المعتاد من بني جنسه، حيث أن نفسية الرجل و المرأةتختلفان وبالتالي عند تفهم هذه النقطة بالذات نستطيع بناء جسر التواصل بينهما.

هديتي لكم اليوم نسخة من هذا الكتاب..... أرجو أن تستمتعوا بقرائته
للتحميل إضغط على صورة الكتاب

حقي ومن حقي

عودة إلى إحترام حقوق الغير

هل أصبح لازما عند إشتراكنا في أحد المواقع أو المنتديات أن نخصص عناون إيميل فرعي بحيث لا نفاجأ بشخص ما يضيف العناون على الماسنجر بدون إذن و بدون هدف إلا مجرد تجميع أكبر عدد من الإيميلات لدواعي الإستعراض
هل هناك من يستطيع شرح الوضع لي عندما أبعث بشكوى لأحد المواقع لمشكلة أواجهها فأفاجأ بصاحب الموقع يضيف إيميلي لديه... هل حل المشكلة يتطلب بعض الدردشة ولا يمكن حلها عن طريق الإيميل؟؟!!!
لماذا لا يراعي البعض ظروف الآخرين... فأنا مثلا لا أستخدم الماسينجر إلا للتواصل مع زوجي في حالة تواجده خارج المنزل ... قد يكون وضعي أفضل حالا من أخرى قد تواجه مشكلة مع زوج شكاك
كنت قد إشتركت في أحد المنتديات والذي لجأ أصحابه لأحد الأشخاص المتخصصين لعمل new look
وبعدها إكتشفت أن هذا الشخص أعطى قائمة المشتركين لبعض المنتديات الأخرى و التي امطرتنا بوابل من الإيميلات لنشترك بها!!!!
مازلت أتسائل إلى متى سنتجاهل إحترام خصوصية الآخرين
قد تقولون أن الإختيار أمامي للقبول أو الرفض و اتسائل لماذا يحدث هذا أساسا منذ البداية ولماذا أصبحنا لا نهتم بالأصول و المفروض؟؟

:: S n a p s h o t s :: مصدر الصورة مدونة