mbc4

من فترة بدأت إم بي سي فور إعلاناتها بحيث تحدد تارجت المشاهدين لها ب (هي) واضح جدا من الفواصل بين البرامج ..... طبعا مش القصد إن محدش يشوفها تاني غير المرأة ولكن لأن البرامج التي بدأتها كثير منها يتعلق بالمرأة و الأسرة و طبعا برامج الواقع أبرزها
super nanny - nanny 911 من البرامج التي لفتت إنتباهي
لأن هذه البرامج تتعلق بتربية الاطفال... شفت فيها العجب و لم اعجب لأن اطفالنا يتصرفون بنفس الإسلوب و نحن كأمهات نتصرف أيضا بنفس الإسلوب... نصيحتي لكل إمرأة و فتاة أن تشاهدها يمكن تعرف ليها ولادها بيعملوا كده و غزاي تتصرف معاهم.. الأولاد أصبحوا غاية في العصبية و الشقاوة و عدم إحترام الآخرين و بذائة الالفاظ
من هذه البرامج أيضا Dr.Phill
لكنه يتناول العلاقات الإجتماعية و الاسرية عموما قد نجد فيه بعض الإفادة و ليست كلها على إعتبار إختلاف بعض عاداتهم وثقافتهم عنا
حاليا يعرض برنامج من برامج الواقع... للأسف نسيت إسمه و لكنه يتعلق بالأبناء في فترة المراهقة و طبعا نحن نعلم كم هي فترة صعبة لأولادنا هنا فما بالك ببلد لا يوجد فيها أي مباديء أخلاقية
هذه النوعية من البرامج و التي يجب ان نشاهدها فقد نخرج بمعلومة منها بدلا من ستار أكاديمي أو سوبر ستار وكل برامج (العار)... نحن نفتقد هذه النوعية في قنواتنا اللهم إلا في إم بي سي العربية و التي تنقل هذه النوعية من البرامج أحيانا و لكنا فاشلة لأنها عبارة عن مسخ للبرنامج الأصلي

فاتورة التليفون

براجع 140 أونلاين علشان فاتورة التليفون ألاقي في الفاتورة مبلغ .0.01 جنيه يعني قرش واحد في بند محافظات!!! غريبة
أولا لأننا مش بنتكلم محافظات و ثانيا إننا لو هنتكلم محافظات و يادوب فتحنا الخط هياخد على الأقل ربع جنيه ولا حاجة مش قرش واحد
طب لو كل واحد عنده قرش واحد بس زيادة على الفاتورة و لعدد 30 مليون عندهم تليفونات يا ترى الهيئة القومية للإتصالات هيكون في جيبها كام..... 30000 !!! يا جمالهم
ده طبعا بإعتبار عدم إضافة أكتر من قرش للي أساسا بيكلموا المحافظات
و الجميل كمان بعد مراجعة جميع أرقام التليفونات اللي تخصنا و تخص الأهل... بند رصيد سابق بردو فيه مبالغ محسوبة... طب محسوبة على إيه... هي الهيئة بتسيب حقها.. أكيد كل واحد بيروح يدفع فاتورة التليفونات لازم يدفع المبلغ بالضبط إذا مكانش أكتر منه... ماهو أحياتا بيبقاله جنيه ولا حاجة والمحاسب مش بيلاقي عنده فكة!!!
إمبارح التليفون فصل حرارة... كده منه لنفسه.... مع العلم إننا مستنيين في اليوم ده بالأخص مكالمة شركة النت علشان الإشتراك الجديد.. وبعد مراجعة جميع الوصلات ملقيناش فيهم مشكلة مع إننا اساسا مقربناش ليهم قبل كده بس قلنا يمكن
جوزي راح النهاردة للسنترال علشان يبلغ ... يلاقي إيه... قالوله كلم 111... يقولهم طب أنا جيت بدل ماتكلم خدوا رقم التليفون يقولولو ممنوع
طيب و أمره لله يكلم 111 طبعا يعني مش هيتكلم من التليفون البايظ !!!! ماعلينا
كلمهم يلاقي رسالة صوتيه إضغط رقم كذا علشان كذا و الكلام اللي منم النوع ده
ماشي خلص المكالمة وقالوله في خلال 48 ساعة هيتم إصلاح العطل
يا جمال التطوير و التكنولوجيا

موضة ولا إدمان.. متفرقش

مسألة التدوين بقت موضة... بدليل إني كنت طول عمري فاشلة في التعبير و بالرغم من كده عندي مدونات :)
الهدف من الموضوع ده إيه؟؟؟!!!!
أنا بقيت مدمنة مدونات مفيش يوم يعدي غير لازم أكتشف مدونات جديدة و أكون عديت على القديمة و لاحظت حاجة لذيذة قوي
إفرحي ياللي إنتي مش غرمانه
لاحظت إن المسألة فعلا قلبت بجد مع ناس زيادة عن اللزوم
زي اللي كدب كدبة و عاش فيها أو اللي صدق نفسه و ساق فيها واللي عايش في الدور قوي واللي قاعدين ينفخوا فيه لحد مافرقع
تلاقي البداية مجرد مدونة هدفها الفضفضة و لما يلاقي محدش بيرد عليه يبتدي يجرب كل المواضيع الممكنة لحد مايدوس على الوتر اللي يعجب الناس و هيكون إيه غير السياسة و الدين ماهو كل واحد بقى سياسي كبير و شيخ الشيوخ. الأنقح من كده اللي لقوا إن التميز مبقاش في الكلام السياسي و الفتاوى ... مبقتش تجيب همها ودول بقى عندهم رغبة شديدة في الظهور و التميز فملقوش غير سب الدين ووصلوا للذات العليا...
تعرفوا إن لو لقيتوا واحد أمريكاني بيدور على هوية دينية غالبا بيقرأ في كل الاديان لحد مايوصل للي حاسس إنه مرتاح فيه و نادرا بل يمكن أبدا إنك تلاقيه بيشتم معتنقي الأديان التانية... أما هنا فلو لقيتوا واحد بيسب الدين و الأديان فغالبا لو حاولت تفهم منطقه إيه هتلاقيه محطش منطق... طبعا ماعدا التهريج الفاضي و السباب الدائم وغالبا في حياتهم العادية واخدين بال... (ولا بلاش ) فوق دماغهم من أهاليهم .... وعجب

تعريفات ولا تحريفات

أنا ناشط سياسي ............................................................. يعني ألعن و أسب في الحكومة
إحنا عندنا حرية تعبير...........................................إنتوا تقولوا اللي عايزينه وإحنا نوديكم السجن
إحنا بلد بتحب السلام............................................واللي يعادينا نهد بلده فوق دماغه وناخد بتروله
إحنا بلد الحرية و الديمقراطية وحرية التعبير........................................واللي تلبس الحجاب يا ويلها
أنا شخصية مثقفة وواعية.........................................................واللي يعارضني يبقى متخلف
أنا إنسان متدين...................................................وإبن ال... ده هعرفه مين الصح و مين الغلط
إحنا جريدة أو حزب معارض................................. يبقى اللي يقول يمين لابد نقول إحنا شمال مهما كان
ده ضابط شرطة.........................................................................مش كلهم سفلة و كلاب
أنا شخص ملحد...................................................................فيها إيه لما أسب للناس الدين
أنا مسيحي أو قبطي.......................................................... يبقى زي (ما بيقولوا) أنا مضطهد
أنا إنسان حقاني........................................................................... بغش في الإمتحانات

************

أنا إنسانة متدينة.................................. بخبي على بابا لما بخرج مع صاحبي بس مش بعمل حاجة غلط
أنا واحد دمي خفيف.............................................................. بحب أتريق على خلقة صاحبي
مبحبش حد يجيب في سيرتي............................................ تخيلي شفت البنت دي مع واحد النهاردة
كلنا ولاد تسعة.............................................................إيه ده خبطت العربية أنا هعرفك مقامك
أنا بحضر دروس دينية........................................................... غور في داهية أنا راجعة لأبويا
ولد الكدب حرام............................................................. تليفون يا ماما... قولها مش موجودة
إنتي أول حب فحياتي............................................................... يادوب مشيت مع عشرة قبلك
إيه ده يا هانم غزاي خارجة بالمنظر ده........................... أيوة يا سنسن أشوفك بعد ساعة لما مراتي تخرج
أنا إنسان مسالم........................................................................ بدي زنب من تحت لتحت
أنا محل ثقة الجميع ....................................................... واللي يديني سره وقت ما أحب هستغله
أنا بياع بصلي الوقت بوقته في الجامع........................................................و بسرق في الميزان

جمال مبارك و الورث

قولوا اللي تقولوه

لا انا عميلة للدولة ولا أتبع أي حزب ولا يفرق فعلا معايا و أأكد إن فعلا مش هايفرق معايا
بس لي الحق أتكلم زي ما كلكم بتتكلموا
إستعجال الشباب في حاجات ممكن يخرب الدنيا أكتر من إنه يقدم خطوة
مثلا
القوانين اللي كان بيطالب بيها الصحفيين و القضاة... بسبب الهوجة بتاعة
المظاهرات و الضغط من هنا و هناك عرفنا إنه بيتم مناقشة القوانين الجديدة
لكن
اللهوجة هنا متنفعش و من الواضح إن القوانين اللي إتحطت مش هتعجب
المطالبين بيها بردو... ليه ... بسبب التسرع في عملها علشان يخلصوا من الزن
نيجي بقى لموضوع الوريث
خليكوا
عقلانيين كده و هتعرفوا إن جمال مبارك واضح جدا إنه مش عايز يبقى رئيس و
مش قصدي التصريحات اللي كل شوية الإعلام يطلعلنا بيها ،لكن إتجاهاته
هتلاقوها كلها تخص الحزب و خاصة شريحة الشباب
مش معقول ميكونش وصل للنتيجة إللي اي حد مكانه ممكن يوصلها .. وهي إنه في الحزب وضعه أفضل و المكاسب أكتر بدون وجع دماغ الرئاسة
تاني
حاجة بخصوص الموضوع ده... إنه اقرب شخص عنده فكرة عن اللي بيحصل للبلد..
معاكوا في كلمة طب ليه من الأول حصل كده... بس إحنا لو فضلنا نقول لو مش
هنقدم خطوة
الحقيقة إنه الوحيد اللي فعلا يقدر يدير البلد و اعتقد إنه
كمان هيقدر يغير فيها للاحسن بحكم تعليمه و تواصله الدائم مع أمريكا و
اللي أكيد قدر ياخد منها حاجة و يستفيد
لا أظن إن أي واحد من اللي
كانوا مرشحين نفسهم كان هينفع مهما حاول يقول.. لان الشفافية بالنسبالهم
مكانتش موجودة و بالتالي معندهمش فكرة واضحة فعليا عن احوال البلد...
ولو
حبيتوا الصراحة أنا عمري ما خاب حكمي على حد و علشان كده و أنا عارفة إن
الكلام ده مش هيعجب حد واحد زي أيمن نور لو دفعوا ليا عليه مليون جنيه
متمناش إنه يبقى رئيس بلدي
بردو الإحترام مطلوب و طريقته في التعبير
كانت فجة جدا و كان بيهاجم بغباء شديد... هو نال إعجاب مجموعة من الشباب
اللي شايفة إن الصراحة قد تعني في بعض الأحيان البجاحة و الهجوم بدعوى قول
الحق.. معلش لأ و مليون لأ
أيمن نور لو مسك البلد كانت تبقى مصيبة من
وجهة نظري ... وخلاف كده مينفعش نجيب واحد يهد الدنيا و يبنيها من أول
وجديد.. لازم يحاول يصلح القديم و يدخل في النص الجديد حبة حبة... محسيتش
الكلام ده من المرشحين ... حسيت إن كل واحد عايز يبني البلد على مزاجه...
وداخل في النص طبعا طلبات الناس و رغباتهم كنوع من الدعاية اللي تنجحة و
الكل نسي إن أي إنسان برة مواقع القوة بيبقى حاجة و بيقول كلام حلو قوي
ولما يبقى في المنصب بينسى حتى أهله
مازلت أؤكد إن جمال مبارك يا رييييييييت يرشح نفسه حتى لو مكنتش هانتخبه
لأني
متأكده إنه ليه سيستم جديد خالص واللي مخلي بلد زي امريكا تقود العالم..
غصب عنه... السيستيم.. النظام... و ليس الأشخاص أنفسهم فهم لا يتخيروا عن
ما لدينا وقد يكونوا اسوأ

كمان انا عايشة زيكوا في البلد دي و مش قادرة احس بإن حسني مبارك سيء قوي
كده زي ما بتحاولوا تصوروه بالعكس انا شايفة كمان غن سياسته الخارجية حمت
مصر من بلاوي كتير
وكمان لأن حسني مبارك ميقدرش يعمل حاجة بنفسه..
الموضوع كله في إيد الحزب من الأساس... مع العلم إني مش بتابع التليفزيون
المصري ولا معمولي غسيل مخ من الجرائد الرسيمية... بكل بساطة مش بقرا
جرايد ولا بتفرج على قنوات مصرية... حلو كده
بردو أنا مشفتش رئيس دولة
كامل من مجاميعه لو كان إقتصادي ناجح ممكن يكون سياسي فاشل و هكذا يعني
الشخص الكامل وما كامل إلا وجه الله مش موجود و السياسة و الخطط السياسية
اللي متخرش المية مش موجودة في العالم كله
و كل حزب وليه توجهاته وبالتالي سياسته بس هي اللي هتتطبق ... يعني مش فارقة
حاجة
كمان أنا عمري ما شفت بلد يترشح فيها حوالي 30 مرشح لمنصب رئيس الدولة.. و
اللي عايز يفيد البلد فعلا عمرة ما هيدخل في الكلام الفاضي ده
ده غير
إن حسني مبارك كان واضح من الاول لما قال إن الإنتخابات دي بروفة... يعني
نتيجتها مكانتش فارقة لأن الهدف منها توضيح فكرة الإنتخابات الرئاسية
للشعب لأن أي سياسي بيفهم عارف إنه مينفعش التغيير الشامل (إذ فجأة) ولازم
خطوات تمهيدية
دي وجهة نظر و مش طالبه من حد يوافقني فيها

النظافة من الإيمان

ماهو طول ما فيه اللي بيقولها إنتي دح... هتفضل تغني الواوا أ...... و بعدين بقى مش قلنا نستخدم الدي دي تي للصراصير

الصبر مفتاح الفرج

مبروك لكل المدرسين
أعلن الدكتور يوسف بطرس غالي وزير المالية المصري أنه يجري حاليا الانتهاء
من إعداد الصياغة النهائية لمشروع الكادر الخاص للمعلمين ، والذي سيستفيد
منه مليون معلم ، وسيطبق من بداية من يوليو المقبل حب ما جاء بموقع ( في البلد )

متهيألي كده مشكلة الدروس الخصوصية هتتضائل والمدرسين اللي بيقولوا غنهم مش لاقيين ياكلوا أوضاعهم هتتحسن

بس أنهم كانوا بيدرسوا عمل كادر جديد للأطباء بحيث إن الطبيب الخريج مرتبه يبدأ من 1000 جنيه
بس ولا من شاف ولا من دري.... هشششش لا يسمعوا

حجاب حنان ترك

أنا مش فاهمة الناس متضايقة من إيه
اللذيذ إن معظم المتضايقين من حجاب حنان ترك هم أول ناس بينادو بالحرية و الديمقراطية وبيشددوا على فكرة الحرية الشخصية
طب ماهي حرة تلبسه أو متلبسوش... فارق معاكوا في إيه؟؟؟
طب ماهي لو قلعته محدش هايتكلم
مش فاهمة ليه ناس واخداهة (حلوانه في سلوانه)
و في مواقع و مدونات تخص ناس عادية جدا بردو ألاقي ناس بتفتي و ناس بتتهمها بإنها لبسته علشان الفلوس و علشان عروض .. بلا بلا بلا
ما كل واحد يخليه في حاله أحسن و يبص لنفسه الاول
ولو كان حجابها قرار شخصي نابع من جواها هي الكسبانة... و إذا كان علشان شوية الهبل اللي بتقولوه يبقى هي الخسرانه
وفي كل الأحوال الموضوع يخصها هي ولا هي ملكيه عامة؟؟ إتقوا ربنا بقى

الحجاب و المايوه الشرعي

لقيت الموضوع ده و بصراحة مقدرتش منقلوش... و ياما هنشوف العجب على رأي صاحبة المقال

الصيف والمايوه.. الشرعي!!

صيف يعني طشة ميه.. يعني نسمة هوا تخبط وشك المبلول فتحس بسقعه.. يعني البلبطة.. ومين ميحبش البحر والمصيف بالذات في الحرارة اللي بتهل على مدينة القاهرة..
تقعد في المصيف قدام البحر والهوا عمال يخبط فيك وتقول بفخر "يا سلام اهو كدة الجو تلاقي دلوقتي اللي قاعدين في القاهرة ماتوا م الحر" ثم الضحكة الشريرة "نيهاهاهاهاهاها" .
وبعيدا عن جوا الحقد والرعب ده فالصيف لا يكون بلا مصيف والمصيف ملوش طعم بدون الصيف.. وصيف يعني بحر ولعب في الميه.. والولاد أهي سهله عليهم ينزلوا الميه.. إنما البنات فدي قصة تانيه خااااااااااالص.
تطور المايوه.. الشرعي!!أن تكون من عيله محافظة.. يعني ممنوع منعا باتا أن البنت تفكر إنها تنزل بمايوه.. لذلك قامت شركات الملابس بإضافة كلمة شرعي لكلمة مايوه وظهرعندنا المايوه الشرعي.. مع العلم إن أصلا مينفعش مايوه مع كلمة شرعي.. هو
أصلا فيه حاجة اسمها مايوه في الدين يا عالم؟
المهم.. أول مايوه شرعي كان للأطفال.. مايوه عادي بشورت "منه فيه"..وانتشر بشدة ذلك النوع من المايوهات.. ولكن المشكلة لم تكن في الأطفال..كانت في الكبار..
لهذا ظهر "مايوه شرعي" من نوع آخر وهو عبارة عن قطعتين.. بنطلون طويل ويتلبس عليه مايوه عادي بس بكم.. وظلت مشكلة الإيشارب إنها لما بتلبسه البنت مع أول نزلة ميه بتطلع كأنها مش لابساه!!.
وهنا ظهر "البونيه".. زي بتوع السباحات العالميات.. لأنه لا يظهر الشعر وفي نفس الوقت بيثبت على الشعر.. شوية بشوية منفعش المايوه الشرعي ده.. لان البنت أول ما تنزل الميه وهي لابساه كانت بتطلع منظرها وحش.. شركات الملابس فكروا تاني.. نعمل إيه عشان نكلفتها أكتر من كدة ويمكن تتكعبل في المايوه اللي اكتر من قطعة ده ويمكن تغرق!!.
تلاتة في واحدفكروا يفضلوا على نفس المايوه بس يزودوا له قطعة تالتة غير القطعة التانية.. البنطلون والقطعة الأولى جسم المايوه.. فزودوا عليه جيبه تتلبس فوق البنطلون.. وتلاقي البنت أول ما تنزل بالمايوه ده الجيبه تقوم منفوخة
وتتحول لعوامة وتحس إن قرش هيهجم عليك مش بنت بتعوم وللأسف برضه البنات متكعبلوش فيه وفضلوا عايشين!!
أخيرا.. أصدرت شركات النسيج مايوه ذو أربع قطع.. قطعة بنطلون وقطعة جسم المايوه وقطعة للبونيه وأخيرا قطعة تتلبس فوق كل ده عاملة زي الجلابية..
وهنا تأكدت وضمنت شركات النسيج أن البنت اللي هتلبسه هتغرق تغرق لا مفر!!
والعجيب أن تجد واحدة منقبة بداخل البحر تصارع الأمواج.. وبمجرد أن تخرج من الماء تتساءل.. هي دي "كانت" منقبة ازاي!!
وطبعا "كانت" هنا فعل ماضي ما نسيبه في حاله!!
وأهو الصيف جه ولسه هنشوف العجب
موقع عشرينات
بس أرجع و أقول ماحنا فعلا بنشوف كل يوم العجب... بالرغم من إنتشار ظاهرة الحجاب بشكل كبير في المجتمع المصري ، مازال (العجب) مفروض علينا كل يوم من أول الإيشارب الربع متر المربوط حوالين الرقبة كأنها عايزة تنتحر طبعا مع نص الشعر اللي باين من قدام (يعني المسكينة تقطع نفسها و تجيب قماش منين) وطبعا البلوزة اللي زرايرها مفتوحة أو البادي اللي الديكولتيه واصل لركبها... هتقطع نفسها يعني مالدنيا حر
إلى الإيشارب الملبوس مع تيشيرت نص كم و الطرحة الملبوسة على برمودا أوحجاب مع بوت و جيبه للركبة و اللي مابينهم باين... معلش ماهي لابسة شراب فيليه.. ولا العبايات اللي بتتلبس و من الركبة مفتوحة و طبعا معاها
الإيشارب النص (شعر) ومتنسوش إنها لما بترفع إيدها الكم بيوصل لحد الزور!!!! واللي زاد وغطى الهاي ستوميك على جينز شاكيراو الإيشارب اللي مبين القفا مقولوكوش عليه ... ناقص أشوف تاتو
و أقول إيه حسبي الله في كل واحدة من دول... حد يقدر يتخيل إن ده سبب رفض بعض الناس للحجاب

من واقع الحياة

هدير معيدة في كلية تربية رياضية مرتبها ممتاز ولكنها مازالت تأخذ مصروفها... مرتبها لا يكفيها.... بنت وحيدة مدللة تعودت على عدم وجود والدها في المنزل معظم الوقت بسبب ظروف عمله ووالدتها هي من تقوم بإدارة المنزل

حسام رجل أعمال... من عائلة كريمة و هو بالرغم من أنه أصغر أخواته وولد وحيد إلا أنه ذو شخصية قوية رجل بكل ما في الكلمة من معنى.. والدته ذات منصب مرموق و تركت العمل لتكون زوجة و أم ووالده ذو عقلية رائعة وربى أبنائه تربية ممتازة

تزوج حسام من هدير
هدير إستمرت في العمل برغم تعارض مواعيده مع مواعيد حسام
هدير تصرف كثيرا... تخرج كثيرا... تطلب كثيرا ولا تكتفي
هدير تهمل بيتها ولا تقوم بمطالب بيتها إلا بعد شجار
حسام شخصية متطلبة... يطلب الكثير ولكنه مستعد لتقديم الكثير أيضا من الحب و الإهتمام بالرغم من مشاغله
لدى حسام امل أن الحياة الزوجية ستغيرها يوما ما
بعض المشاكل تظهر كأي حياة زوجية
دائما ما تهجر هدير منزلها كلما حدثت مشادة
ولكي تعود تطلب هدية
في إحدى الشجارات التي حدثت بينهم لم يتحمل حسام إسلوب هدير و صفعها
فما كان من هدير إلا أن مدت يديها و ردت له الضربة و لم تكتف بذلك بل قامت بكسر الريموت كنترول على رأسه
حسام يفكر هل تزوجت إمرأة أم رجلا... الرجل في بيته يلتمس الحب و الراحة .. أين هي؟؟؟ لا أطلب عشاء خمسة نجوم فقطعة من الجبن تقدم بكل حب هي عندي أثمن من أي شيء... أين هى الزوجة التي تهتم ببيتها.. أين رقتها
هدير تفكر حياتي في بيت أهلي كانت أفضل... كنت مدللة ولم يكن مطلوب مني شيء... هو يستطيع أن يحضر خادمة لما لا يحضرها
يستطيع الأكل كل يوم في أحسن المطاعم لما لا يأخذني إليها
هدأت المشكلة بعد ذلك و لكن حدث شجار آخر مرة أخرى و كانت المشكلة بسيطة و رد فعل هدير أضعف من السابق ولكن ماذا فعل حسام؟؟
طلقها... تقول لكل الناس لم يكنا رجلا بما فيه الكفايه!!!!

غدير مهندسة شخصيتها مستقلة وتحب العمل كثيرا و مرتبها لا بأس به بالنسبة لوظيفة حكومية هي أكبر أخواتها والدها ووالدتها يعملان وحياتهما عادية و تقليدية

تزوج حسام من غدير و علمت غدير أن حسام يعمل كثيرا... فقررت الجلوس في المنزل... فكرت لما لا مادام هو قادر على أن يكفي بيته... لا أحتاج الكثير... يعرض عليها حسام أن تخرج لتشتري شيئا لنفسها فتعود و قد إشترت شيئا له أو للمنزل و قد تشتري شيئا صغيرا لنفسها بعد إلحاح منه
غدير إكتفت بزوجها صديق
غدير ليست ربة منزل من الدرجة الأولى ولكنها تحاول وزوجها متقبل هذا الوضع و لديه أمل أن تتغير قريبا
غدير ترى زوجها عصبيا.. تفكر لديه كل الحق فالعمل الحر لا يخلو من المشاكل ولكنها بالرغم من ذلك تتأثر أحيانا و تنفعل أيضا
في إحدى المشادات صفع حسام غدير... بكت و نزلت على الأرض وقبلت قدميه
بهت حسام... ما هذا؟؟!!!! أنا أصفعها وهي تقبل قدمي
تفكر غدير في داخلها... قد لا يكون له الحق في صفعي ولكن لقد علا صوتي... وهذا أمر لا يتقبله أي رجل
حسام يخرج من المنزل و يركب سيارته و يسير بلا هدف ويفكر... كيف فعلت هذا و مددت يدي عليها... لقد أخطأت
قد يكون علو صوتها غير مقصود... قد تكون أحست بالظلم و إنفعلت بدون قصد... لن أمد يدي عليها مرة أخرى .. لقد أخطأت
يعود حسام إلى البيت فيراها متجلمة متعطرة و قد أشعلت الشموع في إنتظاره لقضاء ليلة رومانسية
حسام و غدير الآن في منتهى السعادة.. تمر عليهم بعض الأيام التي تمر على أي زوجين ولكنها تمر و لا يفكر حسام في التخلي عن هذه المرأة التي تعلم كيف تكون إمرأة

يحدث في عالمنا بالفعل

في فيلا تطل على النيل.. مشهد داخلي
حوار بين مدام زينات سليلة عائلة من العائلات الكبيرة و إبنها أحمد
مدام زينات: أحمد هي أم عبده مجاتش النهاردة
أحمد: لأ يا ماما
مدام زينات: طيب ما تروح تشوفها.. أحسن تكون تعبانة
أحمد: معلش يا مام مش هاقدر النهاردة
مدام زينات: خلاص أروحلها أنا.. أتطمن عليها... هي بردو خدمتنا كتير لدرجة إنها بقت واحدة منا... ميصحش بردو منسألش عليها

في عمارة مجاورة من العمارات الحديثة.. الدور العاشر
مدام فيفي زوجة أحد رجال الأعمال العرب تتحدث في التليفون
مدام فيفي: إزيك يا أمي بقالي مدة مشفتكيش.. معلش أصلي كنت في باريس
والدتها: يصح كده يا فتكات متقوليلناش إنك مسافرة... علشان منقلقش عليكي
مدام فيفي: ياااااي... فتكات إييييييييييه..... أنا مش قلتلك تنسي الإسم البلدي ده... أنا إسمي فيفي دلوقتي.. إنتي ناسية وضعي الإجتماعي.. عايزة الناس تقول إيه.. بلدي
والدتها:وماله إسم فتكات ماطول عمرنا بناديكي بيه دلوقتي بقى مش عاجبك... هتتبري من أصلك يعني؟؟؟
مدام فيفي(قصدي فتكات): طب بس بس أحسن الشغالة تسمعك
صباح الشغالة تدخل و تقولها : يا ست هانم إبنك بيعاملني كده ليه؟؟ أنا بقوله يا حمادة جهزتك الأكل شتمني.. ميصحش كده يا ست هانم
مدام (فتكات): نعم نعم!!! مش عاجبك إبني.. يعني إيه ميصحش..ز إنتي كمان هتعلمينا اللي يصح و اللي ميصحش
الشغالة: يا هانم أنا مش بقول حاجة ولا غلطت ... بس بردو أنا بني آدمة
مدام فتكات: لو مش عاجبك غوري مع السلامة.. مليون واحدة تتمنى تشتغل عندنا
الشغالة: لأ يا هانم لحد كده وكفاية محدش يحب يتهان.. أنا ماشية
الست فتكات: في ستين داهية المركب اللي تودي... هي نسيت إحنا نبقى إيه وهي تبقى مين... دي يا دوب حتة شغالة عندنا!!!!ا

World Cup madness

For a reason or another I started to search for world-cup logos, maybe cuz I react to colors & shapes more than anything else, I don't follow the matches or even have no idea about what's happening since it started
I managed to find logos starting from 1970 till the upcoming 2010 {God's Willing}

1970

1974

1978

1982

1986

1990

1994

1998

2002

2006

2010

And this's the logo we designed if Egypt hosted it,,, we lost

Technorati Tags: Worldcup

Egypt The Nile Gift مصر هبة النيل

موسم السياحة السنة دي إنضرب وربنا  أقول إيه....... مينفعش أقول يسامحة
أنا هاقول ربنا ينتقم منه اللي كان السبب

Dear Friends... Images can't show you how much Egypt is Beautiful
This's an example of what you can see

Things you can Enjoy
1- The Light & Sound show at the Pyramids in Giza
2- Enjoy a Nile Cruse specially at night
3- Visiting Khan El-Khalili in Cairo, as it has the oriental falvour & you can buy some beauty things from Bazars there
4- The Temples In Luxor, The Karnak & Valley of Kings
5- Diving in Sharm El-Shiekh which is the pest spot in the world
6- Hurghada is one of the best too in diving
7-
Aswan's famous places specially Phieala temple, the plants oasis &
the High Dam... Don't forget to buy spices & goodies from the local
market there
8- Alexandria, the Qaitbay Castel, Muntazah Palace, a walk on the Cornaish (by the sea) & the latest the Alexandria Biblioteca
9- Sakkara & the first step pyramid.
10- The Hanging Churche
11- Muhammad Ali's Citadel
12- Don't forget to visit the Museums
13- The Last thing that you should do is to have a free tour on feet, just to discover the ordinary life there
& much more




View A lot Of Pics In Here

Technorati Tags: Egypt, Tourism, Sharm El-shikh, Hurghada, Pyramids

البورصة

نرجع و نقول تاني
يا جماعة البورصة للي يفهمها.. مش كل واحد يفتكر إنه يفهمها
اللي  ميفهمش فيها أحسنله ميدخلش فيها
لأن اللي مبيفهمش بيخرب بيت اللي بيفهم
فهمتوا و لا أقول تاني؟؟؟؟؟ قصدي تالت
من حق كل إنسان إنه يلاقي فرصة يطلع بيها على وش الدنيا
بس يا جماعة مش على حساب خراب بيوت الناس
المفروض اللي يفهم يعرف إن لما البورصة تنام الناس تشتري مش تبيع
إفهموا يقى

الدنيا حلوة بس شايفينها مهزوزة

سهل قوي نتضايق أو نشوف النص الفاضي بدل مانشوف النص المليان... بس فيه حاجات كتير حوالينا ممكن تخلينا ننسى الدنيا و نسرح معاها .. نعيش لحظة حلوة و نحس إحساس حلو وبعدها كل شيء بيهون
نفسي أرجع تاني للممكان ده... أد أيه حاجة بسيطة زي دي.. مكان زي ده.. لحظة صفاء ممكن تخليك تكمل المشوار.. مش مهم الصورة تكون مهزوزة... المهم إنها حلوة
إهداء لكل المعترضين دائما وكل اللي مش عاجبه حال

شخبطة

وأنا بدور في أوراقي القديمة لقيت شخابيط ليا

طول عمري بحب أرسم خطوط و ألعب لعبة الكتلة و الفراغ
و اللون الأبيض و اللون الأسود و اللي بين البينين منقط و مخطط
يا ترى لما تكون شخبطتي في يوم من الأيام كان شكلها كده


يبقى نفسيتي كانت وقتها إيه
مفيش دكتور نفساني يحلل؟؟

إللي إختشوا ماتوا

طلعت السادات في القاهرة اليوم
بمنتهى البجاحة (خلعت البانص علشان أحتك بيه ) هو الراجل ده شارب أيه قبل البرنامج؟؟؟
عمرو أديب بيكرر السؤال و البيه عضو المجلس بيؤكد إنه عملها
حد شاف الحقد و الطمع اللي بيتكلم بيه تحت مسمى إنه قلبه على مصر
طمعان في رزق غيره... باصص للي في أيد غيره... طمعان في لقمة في بق غيره
هو ده واحد من أعضاء مجلس الشعب اللي إختاره الشعب
ما شاء الله .....ده اللي إختشوا ماتوا

يا حلاوة

مابين الأفلام والبرامج و المسلسلات.. لازم طبعا نتابع وصلات من الإعلانات المعمولة مخصوص علشان تفضي الجيوب العمرانة و تملأ العقول التعبانة... ماعلينا
الجديد في عالم الإعلانات: شامبو مش عارفة إيه للشعر المتغطي
أحسن يا عيني الطرح والإيشاربات بقت جافة و دهنية
كله كوم و إعلان الشامبو العالمي ده كوم
عارضة الأزياء المحجبة نكتشف إنها في خلال عرض الأزياء مغطية شعرها علشان يا حراااام مش لاقية شامبو يناسبها
ولما تكتشفه أكي طبعا نهاية الإعلان واضحة هاتبين شعرها و تتباهى بيه
أول مرة أعرف إن المحجبات شعرهم وحش... يا حلاوة

إرحموا عزيز قوم

وصدر الحكم في قضية قروض البنوك و رجال الأعمال
بعد ما إتبهدلوا و إتخرب بيوتهم و سائت سمعتهم و مات منهم ناس و إصيب بعضهم بجلطات و أزمات قلبية و بناتهم متجوزوش و الأقارب تخلوا عنهم و الاسر تفككت و الأولاد وصموا بآباء حرامية,, وكتير منهم سابوا مصر
و طلع إن سبب المشكلة.... ناس ضمائرهم تعبانة و ناس عندها رغبة في إثبات وجودها على حساب الغير
و بعد ده كلوا نسأل يا ترى رجال الأعمال مبيستثمروش في مصر ليه؟؟؟؟
طبعا لأن أصحاب الضمير ملهمش مكان في بلدنا... أما الحرامية الحقيقيين محدش يقدر يقرب ليهم
وإرحموا عزيز قوم ذل

Technorati Tags: القروض

عن البهائية (قالولي).. مع الإعتذار للأغنية

لقيت الموضوع ده عن البهائية... وسيبالكوا الحكم
هم طائفة ادٌعوا ان هناك دين جديد ورسول جديد اسمه بهاء الله وان هذا
الدين نسخ الاسلام وهم يعترفون بالمسيحية واليهودية انها لم تحرف كما
يعترفون بالإسلام! أمرهم هذا منتشر منذ زمن في إيران والعراق وفي مصر ولكن
المصيبة انهم خرجوا الان عن صمتهم ورفعوا قضية في مصر(الان) يريدون ان
تعترف بهم الحكومة كدين خاص وتكتب الديانة في شهادات الميلاد (بهائي) مثل
مسلم أو مسيحي.

البهائية والصهيونية

* يعتبرون عكا في إسرائيل المركز الروحي لهم.

* تم تأسيس بيت العدل في إسرائيل تذهب إليه أموالهم.

* يجوز للبهائي أن يذهب لبيت المال في إسرائيل.

* يقول محمد شحاتة زعيمهم أنهم يمتنعون عن الجهاد ولو دعوا لجهاد إسرائيل
لأطلقوا السلاح في الهوا. هذا كان سنة 1972ميلادى أي أثناء الاحتلال
الإسرائيلي لمصر!

بعض شرائع وأفكار البهائية

* الصلاة ثلاث مرات: صبحا وظهرا ومساء، في كل مرة ثلاث ركعات، وأبطل الصلاة في جماعة إلا في الصلاة على الميت.

* قصر الوضوء على غسل الوجه واليدين وتلاوة دعاءين قصيرين.

* حدد شهر الصوم بتسعة عشر يوما من كل عام الذي هو عنده تسعة عشر شهرا.
ويكون الصوم في شهر "العلاء" (21:2 مارس) وهذا الشهر هو آخر الشهور
البهائية.

* جعل الحج إلى مقامه في "عكا" وهو واجب على الرجال دون النساء، وليس له زمن معين أو كيفية محددة لأدائه.

* البهائية لا يؤمنون بالجنة ولا بالنار.

* كما غيّر في أحكام الزواج والمواريث وبدل في أحكام العقوبات، وفرض نوعا
من الضرائب على أتباعه لتنظيم شئونهم تقدر بنسبة (19%) من رأس المال وتدفع
مرة واحدة فقط.

* كان من تعاليم "البهاء" إسقاط تشريع الجهاد وتحريم الحرب تحريما تاما،
ومصادرة الحريات إلا حرية الاستماع إلى تعاليم البهاء، وإلغاء فكرة
الأوطان تحت دعوى فكرة الوطن العام، والدعوة إلى وحدة اللغة التي لم تكن
إلا وسيلة خادعة لفصل الأمم عن تراثها، وبخاصة الأمة الإسلامية حتى تنقطع
عن كتابها وتاريخها.

وترك البهاء عدة كتب منها "الإيقان" و"مجموعة اللوائح المباركة" و"الأقدس"
وهو أخطر كتب البهاء حيث ادعى أنه ناسخ لجميع الكتب السماوية بما فيها
القرآن.

وأصيب البهاء في آخر حياته بالجنون، فاضطر ابنه عباس إلى حبسه حتى لا يراه
الناس، وتحدث باسمه إلى أن هلك في (2 من ذي القعدة 1309هـ = 1892م) وخلفه
ابنه "عباس عبد البهاء" في رئاسة البهائية.

مواجهة البهائية

*عام 1962م أغلق الرئيس جمال عبد الناصر محافلهم وقال أنه لا يمكن أن تكون هناك قنوات للنشاط الصهيوني في مصر.

*تم إصدار عدة بيانات من الأزهر تقرر بارتداد البهائية وأنها فرقة ضالة.

Technorati Tags: البهائية

حاجة تجنن

حد يفهمني
إيه حالة الضياع اللي البنات بقت فيها
حد يفهمني الأخلاق بقت زفت ليه
حد يقولي ليه الأمهات فرحانة ببناتها لما يمشوا عريانين في الشارع ليه؟؟؟!!!! و الأنكى من كده الأمهات نفسهم إتعروا لييييييييييييييييييه
حد يفهمني البنات معندهمش مانع يصاحبوا رجالة متجوزين و ممكن... لأ مش ممكن ده الأكيد إنه أكتر من صداقة كمان وكلكوا فاهمين
مش قادرة أفهم إزاي بنت ال.....إيه بتلاقي عرسان لقطة وواحدة تانية في حالها وكافية خيرها شرها محدش سائل فيها ليه؟؟؟
مش حاجة تجنن

ما نصدق جنازة و نشيع فيها لطم

ماما كانت بتقولي زمان إن اللي يتجوز لبنانية تنسيه الدنيا
كنت أسألها ليه؟
كانت تقولي لأنها واخدة بالها من نفسها قوي و من بيتها كمان ومفيش لبنانية متعرفش تطبخ ولا واحدة منهم متعرفش تهتم بنفسها ده غير إنهم مثقفين جدا
إمبارح كنت بتابع مع جوزي برنامج عيون لينان على قناة اليوم
و كانت الموضوعات اللي بيتكلموا عنها تخص المرأة بشكل خاص ماكياج و رشاقة و موضة و شوية سياسة في النص مع الضحك و الإبتسام طول الوقت و لقطات من حياة اللبنانيين اللي بيمارسوا حياتحم بطريقة طبيعية و بيستمتعوا بيها لأقصى درجة
سألته هو فيه إيه؟؟؟ ماهي لبنان طالعة عينها و الناس فيها متبهدلة و الوضع الإقتصادي زفت بس بردو واخدين الأمور ببساطةو الستات دايما على سنجة عشرة و بتضحك و الرجالة مهتمة بنفسها بردو؟؟؟
و مش طالعين يطبلوا علي مشاكلهم كل شوية زي ما إحنا نعمل، فعلا المصريين ما يصدقوا جنازة و يشبعوا فيها لطم
قالي ماهو ده الفرق بينا و بينهم واللي بيخلي الست اللبنانية تعمر بيوت و المصرية تخربها
وده مش كلام من بعيد لأ ده ناتج عن إختلاطنا أنا وهو بيهم من زمان
تقريبا نفس كلام ماما
إلا صحيح هو إحنا بنندب حظنا ليه طول الوقت مع إن أحوالنا أحسن منهم بكتير... فعلا حاجة غريبة

الرجال من المريخ والنساء من الزهرة

مش بحب أتكلم عن حياتي لأنها تخصني أكتر ما تخص حد تاني و الحقيقة إني محبش أكون كتاب مفتوح للناس تقرأ فيه لأن المفروض حياة الست شخصية جدا
بس المشكلة إن بعض الرجالة بتوصل الستات لحال صعب أو إن الست نفسيتها متستحملش
مننا اللي وافقت تنقطع عن أهلها أو أصحابها أو تسيب شغلها وفي كل الأحوال البديل موجود يعني لو فيه أولاد يغنوا عن الاصحاب لو فيه أهل يغنوا عن الشغل و المهم بالنسبة لأي ست إنها بتلاقي اللي تفضفض معاه... الست يهمها تلاقي متنفس لأن دي طبيعتها... لازم تقروا كتاب الرجال من المريخ و النساء من الزهرة
كتير مننا معترضين لكن بصوا لغيركم هتلاقوا دنيتكوا أحلى

من الشيعة.. للبهائية... للصوفية

الشيعة و البهائية و الصوفية و مش عارفة إيه تاني.... كلام كتير بقينا بنسمعه مؤخرا عن هذه الإتجاهات و التي بدأت صراعا لإثبات الوجود ولا أدري له سببا
إذا كان البهائيون مثلا يقولون أنهم الدين الصحيح و أن هذا هو الإسلام فلماذا يرفضون مسمى مسلمين في البطاقة الشخصية
و إذا كان الشيعة مسلمين تفرق إيه الولاية لعلي ولا لعمر ولا لفلان الفلاني ... مش في الآخر مصدر التشريع الكتاب و السنة
أما مسألة السيرة و الأمة الصحيحة مين... متهيألي مش هاتفرق ... هي الناس دي فاضية؟؟؟؟
هو الدين خلاص فهمناه كله و عرفناه علشان كده إبتدينا نتكلم و نناقش يا ترى الإمام بعد الرسول عليه السلام مين؟؟؟؟ و ذريته فين؟؟؟
فيه حديث للرسول عليه الصلاة و السلام عن من ترك صلاة .... فليس في .... كذا
متهيألي معناه إن الصلوات خمسة و ييجي الذين يدعون أنهم لهم دين و يطلقون على أنفسهم إسم البهائيون و يقولون أنها ثلاثة صلوات فقط!!!! ماهو خلاص كل واحد يخترعلة دين و يريح نفسه مادام مش عاجبه دينه
وبعدين في الآخر ما كل واحد يعمل اللي عايزه و يتحمل مسؤليته يوم القيامة واللي يشيل قربة مخرومة..... ولا أيه؟
و المذيع و الصحفي (أبو شعر أبيض الكبير قوي... السئيل أوي أوي) إياه اللي ساب الكلام عن القسيس و الفضيحة الشهيرة في الدير ومسك في الكلام في اللي ميخصوش من حجاب الفنانات و شتم الداعية الشهير ويمكن نلاقيه بكرة بردو بيبدي رأيه في المواضيع دي كمان علشان سيادته بيحب يحشر مناخيره اللي زي البطاطساية في اللي ميخصوش علشان (يسمحله يزهقة و يطهقة)  الله يحرقه

Technorati Tags: الشيعة, السنة, البهائية

تخاريف

قرت مدونتين النهاردة و مكانتش نقصاهم بصراحة: أيوه خدامة و بعدك على بالى
أحيانا بحسد بعض الناس على قدرتهم على التعبير وخصوصا إن أقل درجة كنت باخدها في مادة اللغة العربية كانت على موضوع التعبير و على الأدب و النصوص و الميزة في المدونتين السابقتين وجود بعض الخصوصية ليهم واللي تخليهم يكتبوا أفكارهم بدون خوف من رد فعل مش مرغوب فيه بالرغم من إني أحيانا بتتوفر ليا الحرية دي لكن الخوف بيمنعني و بتضيع الفرصة..
بستغرب أحيانا قد إيه حياة الست بتتغير بعد الجواز و قد إيه الظروف ممكن تغير تفكيرهاو قد إيه ممكن توصل لدرجة من رثاء النفس
الست دايما قبل الجواز بتتمنى تكون مختلفة عن اللي سبقوها و تفتكر إنها ممكن تحس و تتصرف بطريقة مختلفة و تقول أنا وهو بنحب بعض و أكيد هنبقى متفاهمين أكتر... لكن اللي إبيده في المية مش زي اللي إيده في النار وكده كده هيبقى فيه إختلاف و مشاكل وكلام بيطير هنا و هناك مالوش لازمة و ممكن تصل لحد الإهانة و أحيانا بتكون بدون عذر واضح
بتيجي على الست أوقات تحس فيها قد إيه هي خسرت نفسها أو قد إيه هي تعبانة و اللي قدامها مش بيقدر ولو فيه حب تبقى محظوظة لأنه بيحميها من حاجات كتير...
الراجل تعبان قوي علشان بيشتغل طب والست كأنها في أشغال شاقة مؤبدة!!! المشكلة مش في مسؤلياتها المشكلة في عدم التقدير و التقدير مش بالكلام... التقدير بالإحساس بالفعل من غير من أو ذل من غير خناق من غير طلب.. ده شيء من جوه البني آدم مش فرض ولكن ناتج عن نعمة الإحساس

القناعة كنز لا يفنى

ملاحظة لقيتها في المدونات المصرية على الأخص و المدونات بشكل عام... بس أنا هاتكلم عن اللي يهمني فيها (المصرية) لأن ما غير ذلك لا يخصني أو لأنها طبيعية في مجتمعات أخرى
المدونون إتجاهاتهم غريبة جدا
يساريون متعصبون فاكرين نفسهم في عهد الثورة ومفيش مانع من الكلام الرنان و العناوين والمانشيتات القوية كأنهم بيحاربوا الغزاة
أو إسلاميين متشددين مع إن الرسول  عليه السلام قال ما معناه (ليس منا من مات على عصبية أو قبلية) يعني التعصب شيء غير محمود
أو علمانيين لدرجة الثمالة
أو أقباط (وبلاش كلمة مسيحيين) متذمرين
أو ملحدين منحلين
أو ناس لا ليها في الثور أو الطحين!!!! مش حاجة غريبة فعلا
كله رايح يا شمال يا يمن و مفيش وسط إلا نادرا!!!! هو الفراغ قتلنا لدرجة البحث عن قضية نتمسك بيها بغض النظر عن العقل اللي  ربنا خلقنا بيه (مع ركن الملحدين على جنب) علشان نفكر و نحسبها كويس و بتأني؟؟؟ مش فاهمة ليه كل حاجة قوي جدا خالص و الوسط إختفى من حياتنا.. أنا فاهمة إن الأوضاع مش عاجبة ناس كتير و أنا كنت منهم في يوم من الأيام بس الحياة بتصقل الإنسان و بتخليه يركن المشاعر الجياشة في جنب و يفكر بهدوء و يكتشف حاجة غريبة جدا معظمكم يمكن ميفهمهاش
الرضا... القناعة.. التسامح... الصبر... التواضع
 أشياء قد تبدو أنها لا محل لها هنا في هذا الموضوع و لكنها أساس كل شيء
بس هاقول إيه.... للأسف محدش هيفهم قصدي

Technorati Tags: التعصب، الإلحاد، التطرف، التشدد

ناس هايصة و ناس لايصة

مش فاهمة الناس دي بتفكر إزاي
ال إم بي سي بتتحفنا يوميا و عدة مرات بالكتاب الفذ الذي يحكي عن الفارس المغوار الوليد بن طلال ... ياختي كميلة
و أخذت أفكر يا ترى الأخ الملياردير ده بيحكيلنا عن إيه في كتابه ذو الطبعة الأنيقة؟؟؟؟؟!!!!!
هو الراجل ده تعب في إيه علشان يكتب عنه؟؟ يمكن كان عنده حساسية من المعلقة الدهب اللي بياكل بيها
يمكن كاتب عن الناس العبقرية اللي بتشتغل عنده و بيدفعلها أد إيه علشان تفكر بالنيابة عنه
ولا يمكن إزاي هيشجع الفرق السعودي ويلبس بدلة خضرا ب مليون ريال بس علشان خاطرهم
أقولوكوا .... أكيد كاتب نصايح لصغار المستثمرين اللي لسه بيبدأوا حياتهم و ميملكوش يا حراااام غير خمسين مليار بس !!!! بصراحة بيتعب الراجل

Technorati Tags: الوليد بن طلال