إسكندرية (كانت) مريه وترابها في كل مكان

وصلني في الإيميل الصور دي

انجازات محافظ الاسكندرية الجديد

عادل لبيب

و الحقيقة الموضوع ده كان خانقني الايام اللي فاتت
إسكندرية حالها لا يسر عدو ولا حبيب و أقول إيه
حسبي الله و نعم الوكيل في التخلف الحكومي
والجهل التخطيطي و التنظيمي
حد يصدق إن الشوارع كلها مكسرة و الكلام ده إبتدى إمتى.... في شهر مارس
موسم المصيف بعد شهرين تلاتة...
يا ترى يلحقوا يخلصوا قبلها و بنفس الجودة السابقة؟؟
طب لو هم بيعملوا كده علشان المصيفين مش يقسموا الشغل ولا الناس لازم تمشي تلاقي كل الشوارع مكسرة
إسكندرية مش طريق الكورنيش و بس فيه ناس عايشة فيها يا ناس يااااهو و عايزين يمشوا في شارع آدمي

فاصل إعلاني

في مدونة همس النساء فسر لي البعض أن عدم الإقبال عليها في البداية سببه عدم إعلاني عنها
و ها انا أتدارك الأمر في المدونة الجديدة
A Place Called Home
حيث تم فصل موضوعات الديكور فيها لتكون المدونة الأكثر تخصصا لدي


تحياتي للجميع

عودة....... بتلوموني ليه

الحمد لله عودة للتدوين... بس ما زلت محتاجة دعواتكم...
وشكرا لكل من تفضل بالمرور و علق بكلمة دعم و مساندة أو دعوة لله في لله و ربنا يجعل بيت المحسنين عمار :)

فيه مواضيع لما بكتبها أحب أأكد قبل ما أكتبها إني لا متطرفة ولا متحيزة.... لكن ميمنعش إني أتضايق زي البني آدمين أو يستفزني خبر و أخرج منه بسؤال أو فكرة
وزي ما هو واضح إن مدونتي مالهاش إتجاه خاص.... أقصد إني لست مهووسة دينيا أو سياسيا ولكن أنا مجرد إنسانة عادية بيدور في عقلها تساؤلات.... إتفقنا؟

خبر اليوم.... علامة تعجب كبيرة قويي !!!

الأنبا بيشوي يثير أزمة بين الطوائف المسيحية

وجهت قيادتي الكنيستين الكاثوليكية و البروتستانتية، إنتقادات حادة للانبا بيشوي أسقف دمياط، وسكرتير المجمع المقدس ، لهجومه على المذاهب المسيحية غير الأرثوذكسية، التي وصفها بيشوي بأنها مذاهب "فاسدة"، وأتباعها"كفرة"، ولن يدخلوا ملكوت السماء.

المصدر وباقي الخبر: في البلد

دبوس النهاردة (إلهي و إنت جاهي و سندي و معيني يدخل في عين كل واحد من إياهم) .... إشمعني الموضوع ده عبارة عن خبر مر مرور الكرام؟ بالرغم من الأزمة الكبيرة قوي زي ما بيقولوا اللي مسمعناش عنها !!!!!
ولا سمعنا كلام عن إرهاب ولا تطرف... مجرد تعصب ولا سمعنا إن ماما أمريكا زعلانة
وبس كفاية كده

إستطراد على جنب.......
إشمعنى إحنا كمسلمين فضايحنا على عينك يا تاجر و اللي ما يشتري يتفرج!!!!!
بتقولوا من طيبة قلبنا ولا من غبائنا ؟؟؟؟ .... بتقولوا لاننا مش بنخبي اللي جوانا و نبين غيره زي ما غيرنا كتير بيعملوا؟؟ أكيد الموضوع مش كده ... لأن مثلا البوذيين في بلاد الكفرة مش بوشين ولا بيعادوا بعض وقلبهم طيب!!! و من غبائهم فاكرين البوذية دين... لكن مبيقعوش في أخطائنا.... و ده بكل بساطة لانهم قدروا يلتزموا بتعاليمهم و مش مشكلتي إنها أبسط من الإسلام ولا اسهل... هو مجرد إتجاه صاحبة مؤمن بيه و ملتزم ناحيته.... يا ترى كام واحد من الاديان التانية بيعمل بحق ربنا زي ما إتكتب في كتابه؟؟؟
هل ده يا ترى ليه دخل بتعاليم دينه ولا حاجة تانية؟
الخلاصة إن عقل ونفس البني آدم هما اللي بيحلوه يعمل الخطأ والنفس امارة بالسوء مش الدين.....

الخلاصة.... كفاية الكيل بمكيالين... والخبر بيقولنا إن مش المسلمين بس اللي بيتهموا الناس بالكفر بالرغم من إن الإتهام مصدره القرآن الكريم اللي هو كلام ربنا مش كلام مخترعينه يعني لما يتقال في المواقف الصح... مش مجرد رأي واحد زهقان من نفسه.... يبقى تلوموا المسلمين ليه؟؟؟
بس خلاص

ملحوظة:
ممكن اكون تشعبت في الموضوع كالمعتاد.... بس هي دي أنا

فاصل قصير و سنعود

لظروف خاصة واستثنائية
سأضطر للتغيب عن التدوين لفترة قد تطول أو تقصر
كل ما أحتاجه هو دعوات الجميع
و أشوفكم على خير

مجلات... مجتمعات.... هيافات

مجلة هايفة من مجلات إستعراض حفلات المجتمعات الراقية إشتريتها
لاحظت فيها بعض الملاحظات

(1)
من يدعي إن المجتمع السعودي مجتمع مغلق فهو جاهل
حيث تم عرض صور لفتيات سعوديات و اخريات سافرات (على حد تعبيرهم) أعتقد من جنسيات أخرى في حفلة ترويجية (مختلطة) تم تصويرها في منتجع جده

(2)
المجتمع اللبناني بعد الحرب الأهلية السابقة كان قد وصل إلى مرحلة سلام طائفي وخاصة لتعدد الطوائف الدينية فيه
لأو ل مرة أرى الصليب معلقا في رقاب الشباب!!!! إعلانا عن هويتهم وهي ظاهرة جديدة

(3)
الحفلات المصرية من أشد الحفلات قذارة.... حيت تتنافس الفتيات بل و السيدات لاستعراض لحم أجسادهن والتقليد الأعمى للمجتمعات الغربية بشكل غبي و مستفز
وبالتالي من يطلق عليهم رجال و سيدات المجتمع الراقي في بلادنا هم من احط أصناف البشر (عالميا) فلا هوية لهم بتاتا بل هم عبارة عن قرود تتفنن في تقليد الغير و بغبغانات تستمريء الحديث بأي لغة عدا لغتنا العربية... هذا بالإضافة إلى تجاهلهم تماما لعاداتنا وتقاليدنا التي أصبحت من وجهة نظرهم سمة من سمات التخلف والحديث هنا لا يشمل الفنانين!!!!
تذكرت الحلقة التي تم تخصيصها في برنامج مسائك سكر زيادة لاستعراض حفلات الفالانتين والتي إستفزتني بشدة لمدى الإنحلال الذي رأيته فيها ... إستفزتني خاصة بعدما قال أحد الحضور الفرنسيين أن الفالانتين لديهم إختفال شخصي جدا وليس مشاعا و صاخبا كما رآه في مصر !!!!

(4)
المجلات المصرية الخاصة بالمرأة لا تراعي 90% من شرائح المجتمع بل هي موجهة للشريحة المذكورة اعلاه فقط فليس غريبا أن ترى إستعراض لملابس البحر أو وجبات تحتوي مكونات غير متواجدة في الأسواق العادية و البقالات

(5)
حاجة كمان هتجنني... ليه معظم (نساء المجتمع الراقي) يتفاخرن بقلة عدد أولادهن أو عدم إنجابهن للحفاظ على الرشاقة أو تجد فيهم من تدعي ان بنتها هي أختها خجلا في مقابل مجتمعات أخرى أكثر إنحلالا تقدر و تقدس معاني الأمومة بل تتفاخر بأولادها و تصر على ظهورهم في أي مناسبة يتم تصويرها... واضحة جدا في نوعيات الصور و المقالات اللي بيتم تصويرها للمجتمعات المصرية و المجتمعات الأخرى... اللبنانية مثلا والتي تعد من وجهة نظر البعض أكثر إنحلالا و بننسى إن (سلوهم) كده

(6)
علامة تعجب ... ما المعلومة أو الفائدة التي ستعود على القاريء من مشاهدة هذه النوعية من الأخبار مع العلم أن المجلة عدد صفحاتها يفوق ال 250 صفحة منهم 150 صفحة صور إحتفالات المجتمعات مع التركيز على الفتيات بشكل خاص!!!!

(7)
مستوي الصحافة و الطباعة... الطباعة أصبحت فاخرة جدا... التطور التكنولوجي واضح في هذه النقطة أما المشكلة الأساسية في المحتوى... إنحدار مستمر في نوعية الوجبة الفكرية التي تقدمها مجلات هذه الأيام... أما المجلات الثقافية قرائها قلة قليلة لا تساعد على تطويرها

وللأنوثة أيضا تعريفات

لسه حالا في برنامج مسائك سكر زيادة على أو تي في
الضيفة ( أعتقد متخصصة في علم النفس او علم الإجتماع) بتحكي قصة كدليل على معلومة قالتها لمقدمي البرنامج عن مشكلة الإنصات بين الرجل و المراة
تبدأ حديثها كالتالي:
وأنا قاعدة (بشيش!!!!!!!!) في مكان ما حصل كذا وكذا
المذيع: باستظراف.... كنتي بتشيشي؟
الضيفة: ههههه أيوة
وتكمل حديثها
..............
وللحديث بقية في الأخلاق و تعريفات الأنوثة

مبقاش راجل!!!!!

الرجولة و معناها... كلام في الرجولة... تعريفات للرجولة... إدعاء الرجولة.. وأشباه الرجال
موضوع شغل تفكيري مؤخرا... بسبب المصادفات المتتالية التي تتعلق به من قريب أو من بعيد

الأخ (المشخصاتي) تامر هجرس كان حاضر حفلة عاملاها أوراسكوم للإتصالات من ضمن مجموعة من الناس المشاهير
وبما إن الخبر مهم قوي من وجهة نظر مذيعي و معدي البرامج في أو تي في... فكان لازم يجيبوا الخبر في إحدى فقراتهم و من ضمن الشو اللي في الحفل كان الفريق الغربي البوسي كاتس!!! ما علينا
يتفتق ذهب المراسل الحربي... قصدي مراسل القناة بإنه يسأل الحاضرين إيه رأيوكوا في الفريق
يقوم المشخصاتي المقدام (و اللي قال في حفلة تانية رأيه عن الحفلة بإنها حفلة صايعة وعلشان هو صايع فالحفلة عاجباه)
قال إيه حبيب مامته يختي عليه... قال بالحرف (مبقاش راجل إذا قلت معجبونيش)!!!! لا فض فوه
ونيجي هنا لمحور الموضوع... إيه معني الرجولة عند الرجالة... ولا مؤاخذة مقدرش أقول إن مقدار الإستجابة الحسية لشوية أشباه الرجال لأي حركة هدفها عرض السلعة و إثارة الغرائز بتصدر من أي غانية ده يبقى مقياس للرجولة
و أكيد طبعا مش معناها توتو اللي بيبين البوكسر من فوق بنطلونه اللي شاحته من أخوه الصغير... علشان يبقى واد روش روش (تحن)
أكيد مش بمد الإيدين و تربية العضلات و أي خناقة يا كابتن إحنا في الخدمة
ولا بالصوت العالي ولا أكيد بمعاكسة أكبر عدد من البنات في الشارع
وكفاية كده قوي
عزيزي توتو اللي حاطط إعلانك في الجنب هنا (موقع في البلد )
يا ترى شفت الخبر اللي جنب إعلانك؟؟؟؟؟

للأسف ضاع مني اللنك الخاص بالخبر لكن ممكن تشوفوا الصورة

(ملحوزة لتوتو بيه... طبعا حضرتك هتجري تستخبى في حضن ماما أمريكا يوم ما رجل واحد وحش تتحط على أرد مصر... و أكيد الناس البيئة الجرابيع خالص هما اللي هيتدبسوا ويموتوا و بكده تخلص من أرفهم)...

تحياتي لأشباه الرجال!!!!!

تضامنا مع الأقصى

من إيميلي... عن هالة سرحان

القاهرة ـ المدارالعربي : أصدر النائب العام المستشار عبد المجيد محمود أمراً لسلطات مطار القاهرة الدولي بوضع اسم المذيعة هالة سرحان علي قوائم الترقب والقبض عليها في حال وصولها للبلاد بتهمة تشويه سمعة مصر والسب والقذف في حق ثلاث فتيات والحض علي الدعارة وقد شهدت الساعات الماضية تطورات مثيرة في قضية المذيعة الاعلي اجراً في العالم العربي حيث تتقاضي راتبا شهريا قدره 35 ألف دولار بصفتها مسؤولة عن قناة روتانا سينما.
وقد تضاربت المعلومات حول المكان الذي تختبيء فيه هالة في الوقت الراهن فبمجرد صدور قرار بالقبض عليها قامت الاجهزة الامنية بالتردد علي الاماكن التي تقيم بها في وسط القاهرة وفي فيلا بطريق مصر ـ الاسكندرية وشقة بالسادس من اكتوبر لكن اتضح عدم وجودها في اي منها وبسؤال سكرتيرتها الخاصة اتضح انها غادرت الي دبي.
وكانت احدي الزوجات وفتاتان تقدمن ببلاغ للنائب العام ضد هالة يتهمنها بأنها قامت بخداعهن من خلال مشاركتهن في برنامج هالة شو باعتبارهن بائعات هوي يمارسن الدعارة وقد اكدت لهن ان البرنامج مجرد فكرة تمثيلية وان وجوههن لن تظهر علي الشاشة ولكنهن فوجئن بعد ساعات من اذاعة الحلقة بكشف امرهن حيث قام زوج احداهن وتدعي مروي بطلاقها بينما قام خطيب الثانية وهي أماني بفسخ الخطبة وهدد شقيق الثالثة وتدعي ولاء بقتلها مما دفعها للهروب عند احدي قريباتها.
وكان البرنامج الذي اثار جدلا واسعا يناقش ظاهرة انتشار الدعارة بين الفتيات.
وقد انتاب اوساط الاسر المصرية غضب عارم بسبب المبالغة التي حرصت عليها هالة في تضخيم الامر حيث تعاملت مع تلك الظاهرة السلبية وكأنها مرض منتشر في معظم البيوت المصرية وقد انطلقت المناشدات بين العديد من الفنانين والمثقفين فضلا عن رجال الدين الذين طالبوا بمنع هالة سرحان من الظهور علي شاشة روتانا او اي قناة فضائية اخري حيث اتهمها هؤلاء بأنها تسعي لنشر الفتنة والحض علي الموبقات ودفع الفتيات للفجور ودعا عدد من الصحافيين والكتاب لمراجعة الملف العملي لهالة التي تقدم نفسها باعتبارها حاصلة علي الدكتوراه ويؤكد صلاح قبضايا رئيس تحرير صحيفة الاحرار المعارضة انه علي يقين بأنها لم تحصل علي تلك الدرجة العلمية علي صعيد آخر قامت الفتيات الثلاث بتقديم مذكرة لشرطة الاداب هي الاغرب من نوعها حيث طالبن باستخراج شهادة موثقة تفيد ان كلا منهن ليست مقيدة ضمن المزاولات لمهنة الدعارة كما لم يسبق ان تم ضبطهم في قضايا اداب من قبل وقد اصر المحامي نبيل الوحش الذي يترافع عن الثلاث علي ضرورة استخراج تلك الشهادات وذلك لاغلاق الباب امام هالة او اي طرف آخر يحاول البحث عن مخرج لاثبات التهمة علي الفتيات ولو من خلال استغلال تشابه في اسماء بعض المتهمات وقد طلب النائب العام صباح امس الاثنين من مباحث الاداب افادته بأسماء الفتيات وهل سبق اتهام اي منهن في جريمة شرف فاتضح بعد الفحص للملفات انه لم تقيد ضد اي منهن جريمة كما لم يضبطن في اعمال منافية للاداب وعلمت القدس العربي ان هالة الموجودة حاليا في دبي تسعي عبر اتصالات مكثفة بعدد من المسؤولين البارزين في مصر حيث تحظي بشبكة علاقات واسعة البحث عن حل لازمتها التي قد تدفع بها حسب شهادة المحامي ابراهيم عبد المقصود للحبس ما بين سبعة لعشرة اعوام فضلا عن اسدال الستار علي مستقبلها نهائي

كلام كبير قوي.... بس إحنا عارفين إنها مسنودة و الكلام ده كله لمجرد إرضاء الرأي العام وخلاص.... وابقوا قابلوني لو رجعت
وغالبا هنلاقيها رافعة قضية رد إعتبار ضد الشعب المتخلف اللي مش فاهم عبقريتها

تحديث..
أنتكو هالة بترد على الناس الوحشين الحكودين

وهاله سرحان تملك دليل ادانتهن

تسلم المستشار حسين عبد الرءوف ، رئيس نيابة الاستئناف ، الصحيفة الجنائية للفتيات الثلاث اللاتي قدمن بلاغات ضد الإعلامية هالة سرحان تتهمنها فيه بالتغرير بهن من أجل تقديم حلقات تليفزيونية عن فتيات الليل في برنامجها "هالة شو" على قناة روتانا سينما.

كما تلقى تحريات مباحث الأمن العام عن الفتيات ، والتي أكدت أنهن لم يسبق إدانتهن أو اتهامهن في أي قضايا ، على خلاف ما ذكرت الإعلامية الشهيرة.

من جانبها ، أكدت الدكتورة هالة سرحان أنها تملك دليل براءتها ، إذ لديها شرائط للحلقات توضح الأسلوب اللا أخلاقي الذي تحدثت به هؤلاء الفتيات أثناء التسجيل ، واحتوي حديثهن على "ألفاظ غير لائقة" ، والتي تدعي أنه تم حذف هذه المقاطع احتراما للمشاهدين.

وقالت في حديث خاص مع وكالة الأنباء الألمانية من داخل أحد فنادق دبي إنها لم تهرب من مصر كما ادعى البعض ، وإنما هي في مهمة عمل بالإمارات ، بدأت يوم الأحد الماضي ، وسوف تعود إلى مصر الأسبوع المقبل فور انتهائها من عدة اجتماعات تتعلق بمشروعات تليفزيونية.

وأضافت : "أقول لمن يتهمني بأنني لا أجرؤ علي تقديم حلقات مماثلة عن فتيات دول أخرى غير مصر ، أنني قدمت قبل ١٢ عاماً سلسلة حلقات بعنوان (خرجت ولم تعد) علي شاشة قنوات (ART) قدمت فيها نماذج لفتيات عربيات خرجن من بلادهن بحجة الدراسة وتحولن إلى فتيات ليل

وأشارت إلى أنها نزلت خلال تصوير تلك الحلقات إلى الشوارع ومعها الكاميرات ، والتقت بهؤلاء الفتيات وقدمتهن على الشاشة ، رغم أنهن ينتمين إلى خمس دول عربية.

وتابعت : "لا أفرق في برامجي بين مصرية أو غير مصرية ، وأضع يدي على الجرح مهما كان مؤلماً ، فالإعلامي لا يغمض عينيه ، وليست مهمته أن يطبطب ويدلع الضيوف ، وإنما يكشف الحقيقة".

وتساءلت : "كيف تصدقون فتيات من هذا النوع في اتهامهن لي؟ لقد قلن إني قدمت لهن مبلغاً مالياً ليؤدين الدور المطلوب ، وما لا يعرفه كثيرون أن من تقاليد أي قناة فضائية منح الضيف مبلغاً مالياً مقابل الظهور في البرنامج ، وهن يحصلن على مبلغ مالي للظهور في قناة المحور مثلما حدث في روتانا".

وأكدت هالة سرحان أنها تثق في عدالة القانون والقضاء المصري ، الذي سوف يثبت للجميع براءتها ، وأن هذه الاتهامات وراءها خلفيات أخرى

I was smart... not anymore.... تاج

تاج مرره لي قلم جاف... عن ذكريات الدراسة
آسفه للتأخير بالرغم من تواجدي على النت لكني مصابة بحالة من التبلد :)

هل كنت أو كنتِ طالب(ـة) شاطر(ة) في المدرسة والكلية؟

همممم... في إبتدائي كنت الاولى دايما على الفصل و أفتكر في آخر سنة جبت 98% وبالرغم من كده مكنتش من ال50 الأوائل
اللذيذ إني حلمت بنتيجتي فبل ما تظهر... نفس الحكاية كانت في إعدادي و كانت نتيجة الإعدادية 95% وكنت من العشرة الأوائل على المحافظة و السنة دي بالأخص كانت متميزة لاني لأول مرة في حياتي أغيب من المدرسة علشان جالي تيفود لمدة شهر وبعدها علشان ألم باللي فاتني إضطريت أطبق طول شهر رمضان يومين ورا بعض من غير نوم و أنام بعدها شوية و أرجع أطبق يومين تاني
في ثانوي متقسمة مرحلتين.. أول سنة كنت في مصر و في فصل المتفوقات و بالرغم من كده مجموعي كان 89% في النهاية وزعلت جدا لأني عمري ما قليت عن 95%

اما السنتين اللي بعدهم كنت في السعودية... جبت مجموع 95% بس مدخلنيش هندسة لان التنسيق محدد نسبة من الشهادات المعادلة فالفرص بتقل في دخول الكليات اللي بنتمناها
الكلية... فشلت فيها بمقاييسي الشخصية و جالي فيها إحباط بسبب أسلوب الدكاترة... البنات الروشة تكسب

بس تقديراتي في العملي اللي كله رسم و تصميم إمتياز في مقابل مقبول في كل المواد النظري ماعدا الإنجليزي و تاريخ الفن
تقديري كان عالي بالنسبة لتقدير الدفعة و أفتكر إن 50% من الدفعة كانت شايلة مواد و 25% بتقدير مقبول اما أنا كنت من ال25% الباقيين مع العلم إن دفعتي كانت 100 طالب و طالبة :)

إيه كانت أحب مادة وأكره مادة ليك(ـي) في المدرسة والكلية؟

في المدرسة كنت بحب الرياضيات و الإنجليزي و الرسم والنحو (كنت بجيب فيهم الدرجات النهائية) في كل المراحل ماعدا في أولى ثانوي.... ربنا رزقني بمدرسين في منتهى السوء و الظاهر إن كان هدفهم إثبات إن المتفوقات بردو محتاجين دروس (ملحوظة: أنا مخدتش ولا درس)

كنت بكره الأدب و النصوص مووووت و في إعدادي كنت بكره التاريخ بالإضافة ليهم أما في ثانوي كرهت الجغرافيا بسبب المدرسة المتعصبة لدينها والمعقدة نفسيا لانها عانس وكمان كرهت الفيزياء بسبب إن المدرسة كانت من مدرسة تعليم فني

و أول سنة ليها في ثانوي عام فقررت تلحق تلملها قرشين و تثبتلنا إننا محتاجين دروس في الفيزياء مع العلم إن العقدة دي فضلت معايا لحد ما خلصت الكلية يعني كنت بكره الفيزياء في الكلية كمان و مادة الهندسة الكهربية لدرجة إني كنت هاشيلها بس رفعوني في الرأفة أما اللي كنت بحبه كانت المواد العملية كلها و اللي ليها صلة بتخصصي

وكنت أو كنتِ عايز(ة) تطلع(ـي) إيه وانت أو إنتِ صغير(ة)؟

كنت بقول و أنا عندي 9 سنين إني عايزة أبقى مهندسة ديكور ... أمنية غريبة لطفلة في السن ده أكون مهندسة معمارية أو مصممة ديكور و الحمد لله بقيت مصممة ديكور

أما التاج أمرره ل:
شيماء
عبده باشا
فريده
حلم
كلبوزة هانم