ليلتي تدعى فاطمة

دايما أفتكرها... كان إسمها فاطمة.. اول مرة عرفتها كان بسبب تشابه إسم الأب وكانت المديرة بتنادي أسماء الأوائل و لأني كنت من الأوائل طلعت و إفتكرت إنهم غلطوا في إسمي
بعدها إتعرفت عليها أكتر لما كانت من نفس شلة المدرسة في إعدادي وكانت بالنسبة لي مش قريبة قوي.... إعتبرتها في الأول غريبة تفكيرها غريب بس الأغرب إني أنا و هي كنا متشابهين في حاجات كتير قوي و كنا دايما بنطلع بمجموع قريب من بعض.

في ثانوي كانت بردو بالصدفة قاعدة جنبي وبردو مكنتش قريبة منها قوي بس حاولت أتعرف عليها أكتر لأن الشلة بقت مرتبطة أكتر و مينفعش نتقابل كلنا و متكلمش معاها لحد ما سافرت و بعدت عن المجموعة كلها ماعدا واحدة بقت بتراسلني.
لما رجعت و دخلت الكلية دخلت هي كلية تجارة خارجية وهي بتقبل نفس مجموعي تقريبا بس إتجاهي كان مختلف.. وفي سنة تالته قدمنا مع بعض في نفس المدينة الجامعية و اللي كانت بعيييييده قوي عن كلياتنا.. كنا بنخرج مع بعض و بعد كده كل واحدة تنزل في المحطة اللي تخصها و لما كنا نرجع كانت هي أقرب لناس تانية بالرغم من سكنا في نفس الأودة ومكانش فيها غيرنا إحنا الإتنين.. في الفترة دي عرفتها و عرفت عنها كتير... البنت دي مؤدبة جدا و مش معقدة زي ما كتير كانوا بيحاولوا يصوروها... كانت مش محجبة و كانت بتصلي صلاة أحسن مني مليون مرة.. كانت بتقرا أذكار و تدعي و تقرا قرآن و تصلي سنن أنا نفسي كنت مهملاها... سبحان الله... فاطمة دي هي ليلى.

عمري ما سمعتها بتتكلم عن مشاعرها و قلبها و كان الشباب دايما يمسكوها تريقة... ليه لأن ربنا خلقها بشكل مش معتاد و بالرغم من كده كانت جميلة على الأقل من وجهة نظري.
ليلتنا إتظلمت كتير بسبب شكلها و حاولنا كتير نشوفلها عريس... علشان هي كان نفسها يبقالها بيت... مش عيب... لكن كل الرجال مش عاجبهم ليلى.... تخيلوا ليه لأنها مش محجبة حتى والدي ووالدتي كانوا بيتعاملوا معاها بجفاء لمجرد إنها مش محجبة.. طب ليه... أقولوكوا ليه

لأنها بلد فلاحين لا يحترمون فيها المرأة و يقسون البنت بلبسها الطرحة و ما غير ذلك تهان في الشارع و أحيانا حتى اللي لابسة الطرحة ... يوم ما واحدة تلبس الطرحة تبقى يا سلااام تمام أما لو مكانتش لابسها مليون كلمة تطلع عليها فمابالكوا بواحدة نصيبها من الجمال مش كبير... كنت بسمع كلام يتقال عليها و أدافع عنها..
طب حد يقولي ليلى ذنبها إيه... دي حقيقي كان ينطبق عليها كلمة "ذات الدين" لأنها فعلا قريبة قوي من ربنا... و بعدين..
مش قلنا إحنا مش سلعة للبيع... يعني هو الرجالة دايما بيبصوا للتقفيل اللي برة و مش مهم القلب جواه إيه...
طب إيه رأيوكوا إن معظم التقفيل الحلو بضاعته بتبقى مضروبة... لأن البضاعة الحلوة مش محتاجة تزويق.. وفي الآخر مازلنا كلنا ليلى.

لازم أوضح نقطة... أنا بحترم جدا زوجي الحبيب و بقدرة و بعترف إن المرأة أكرم مكان ليها بيتها و مشكلتي هنا مش مشكلة تفرقة ولكنها مشكلة عقليات الناس و سوء تطبيق لشرع ربنا من رجاله كتير..
صدقوني مبدأ المرأة مساواتها بالرجل مش موضوعي بتاتا لأن ربنا مخلقناش متساويين لحكمة يعلمها ... أنا هنا لا أنتقد عقلة الرجل و لكن أنتقد بعض العقليات سواء رجال أو نساء وعدم إحترامهم لشخصية ما لانها إمرأة او لأنها ليست بالمواصفات المثالية من وجهة نظرهم .
أنا لست بليلى و لن أصبح ليلى لأنني لن أحاول مواجهة رجلي... أنا أجلس تحت قدميه و أقدره... وهو يحترمني كثيرا و الحمد لله.