زمان.....
ذكريات رمضان و الطفولة و ايام الدراسة
إحتفالات رؤية الهلال و ترقب و لهفة
نسهر أو ننام و نصحى على السحور
نتفرج على فوازير و مسلسلات (أيام مكانش فيه غير قناتين)
نسمع صلاة التراويح و قرآن قبل الفجر
فانوس لكل طفل
نستنى دايما مدفع الفطار و بوجي و طمطم
لمة الأهل على الفطار و لقمة هنية تكفي مية
كنافة و قطايف وخشاف
والناس بتزور بعض
هدوء و إحساس رائع بروح رمضان
محاولات لقراءة القرآن
و الأهل يعلمون الأطفال ضبط النفس
والمذاكرة كانت تحلى قبل الفطار
إتعلمنا إن الكدب حرام و إننا لازم نحس بإحساس الفقير
إتعلمنا نساعد المحتاج
الآن......
زحمة طول الوقت.. ناس راجعة البيت و ناس رايحة تفطر بره
كل واحد في حاله و العزومات قلت على الفطار
الدنيا (غلا) والفانوس كانه مصنوع من ذهب
الأولاد و ضرب الصواريخ و البمب.. مش مهم تيجي فوق راس مين
الأولاد بيشتموا.. و الآباء كمان... في أي وقت مش مهم
يا ترى فين القرآن قبل الفطار... فين قرآن الفجر؟؟؟!!!
الناس ملخومة في مسلسلات بالكوم ... و كل مسلسل بيشوفوه مرتين
مش عارفة بيلاقوا وقت لده فين
خيم رمضانية... أكل ورقص وهلس.. وإستنزاف فلوس
التدخين مش مفطر!!!!!
بنات بالكوم في صلاة التراويح... الفكرة ممتازة... التنفيذ خطأ
وبنات لابسة اللي على الحبل و ماكياج تقيل بعد الفطار
وبنات تانية مش فارق معاها صوم أو إفطار
و المعاكسات بتزيد قبل أو بعد الفطار
وشباب أو عيال مش فارقة... لسانها زفر
وناس بتصرف في حاجات مالهاش لازمة
و ناس تانية مش لاقية لقمة عيش تفطر
ومازال رمضان عند الله هو رمضان
قال رسول الله صلى الله عليه وسلم:
"من صام رمضان أيمانًا واحتسابًا غفر له ما تقدّم من ذنبه"
"من لم يدع قول الزور والعمل به فليس لله حاجة أن يدع طعامه وشرابه"
"كم من صائم ليس له من صيامه إلا الجوع والعطش"
و... رمضان كريما
No comments:
Post a Comment