تساؤلات مشروعة

أنا عارفة إني بتسائل كتير... طبع بقى :)
بس فكرت كتير لأول مرة السنه دي ليه بنعتبر تاريخ معين لمناسبة موضوع مقدس
إحنا المصريين واضح جدا عشقنا للتواريخ المحددة جدا
مثلا ليلة رأس السنه... ليه دايما بنهني بعض ببداية سنة جديدة مع إن المنطق إن كل يوم بيعدي بداية سنه جديدة بالنسبة لينا
طب بلاش... ليه منعتبرش مولد النبي بداية سنة جديدة او رأس السنة الهجرية؟؟؟ بدلا من التقويم الميلادي بما إننا بلد مسلم أو بما إننا شعب أغلبه مسلم وكل واحد يحتفل بالسنة الجديدة من وجهة نظره
ليه منعتبرش تاريخ ميلادنا بداية سنه جديدة و بدل ما نفكر عملنا إيه في السنة اللي فاتت حسب التقويم الميلادي منفكرش كده في يوم إحتفالنا أو حتى تذكرنا تاريخ ميلادنا
أنا مهنتش حد بالسنة الجديدة بسبب التساؤلات دي... توصلت إلى إنها مش فارقة
خوفي من دخول الفكر الغربي أكتر في عقولنا
شفتها في كارفور... تخيلوا معظم الأطفال بقوا واقفين بالدور علشان يتصوروا مع بابا نويل او سانتا
و الأمر اللي إستغربته أكتر فرحة الأمهات بالأمر و كأنه شيء عادي
ممكن نعتبر ده أمر طفولي و مش مشكلة ... لكن إحنا بننسى إن كل مبادئنا و قيمنا بنكتسبها و إحنا أطفال
معظم المتسوقين لزينة الكريسماس كانوا أسر مسلمة و أمهات محجبات!!!!!!
القيم و العادات و الأخلاقيات و حتى العقائد دخل فيها (رايش) كتير شوه حياتنا
نظرة كده بسيطة هنلاقي التالي:
فكرة شبابنا عن التقدم و مجاراة العصر الحديث هي إنه يلبس على أحدث موضة و إن كانت لا تناسبه
و يكون معاه موبايل أحدث موديل و عربية يجري بيها يمين و شمال و كمبيوتر يعمل بيه شات على الإنترنت او يسمع أغاني (بردو على النت)
ودش أو حتى وصلة دش وياريت تدخل على الكمبيوتر علشان معندوش وقت يقعد مع أهله قدام التليفزيون و منها بردو إنه يشوف اللي عايزه من غير ما حد يقرفه إما كورة او قنوات الشو تايم بنسخها الأصلية اللي بدون رقابة وقبل ده كله كانت
السرمحة قدام احدث مول ...
و مبقتش تفرق ولد أو بنت... كلهم بيتصرفوا بنفس الشكل و إنعكست على المبادئ و القيم الأخلاقية اللي شبه إختفت و حتى معظم اللي بيتشدقوا بيها... بيعتبروها مجرد إكسسوار قدام الناس أما الباطن فلا يعلمه إلا الله
حتى هذه المبادئ بقت مطاطة... و لزجة و غريبة عن مفهومنا عن كلمة مباديء من الأساس
قدرتوا تتخيلوا معايا الطريق ده واخدنا على فين