حالنا يحزِّن... ولا عزاء لدين ولا لأصول

قرأت الموضوع ده لبلو روز و سرحت بعدها أفتكر كل المواقف والأخلاقيات اللي بقيت بشوفها من المصريين رجالة وحتى الستات

*********

وأنا مع جوزي في العربية.. ييجي واحد و يكلمه (في محطة البنزين مثلا) ميكلموش إلا من الشباك اللي جنبي... بس علشان ياخد لقطة لأي ست قاعدة... بتحصل بردو إن أي عربية تعدي جنب أي عربية في الشارع كل اللي فيها لازم يبصوا على الست اللي قاعدة

أي واحدة تمشي في الشارع ممكن واحد محترم جدا يخبط فيها لأن سيادته ماشي يشوح بإيده و في الآخر يبص ليها بتعجب هي مستنكرة ليه و هو حصل إيه يعني... ده بفرض إن الموضوع اساسا صدفة

زمان كان اللي يقف في شباك بيتهم يبص على بنت الجيران و هي بتنشر الغسيل يتجرَّس... دلوقتي عادي جدا تلاقي واحد طالع مخصوص على السطح علشان يتفرج على الستات جوه بيوتها... ولا مانع من تصويرهم بالكاميرا كمان ولو جوزها وقفله في الشباك ولا التراس المحترم هيبص بكل بجاحة و يقوله ... فيه (عاجة)!!!!!

إمبارح و إحنا بنشتري طلبات البيت لقينا الناس ماشية في السوبر ماركت زي ما بتمشي في الشارع بالضبط... يعني لو واقفين في مكان لازم يسدوه حتى لو يعدي عشرة و أنا واقفة ببص على حاجة و سايبه المكان جنبي فاضي يعدي الناس مع العلم إن الممر لاتنين لقيت واحدة بتزقني أنا و الكارت و بتقولي... (وسعي كده) ولا عزاء للذوق

اللذيذ إن الشعب المصري دايما بيتبع سياسة أبو بلاش كتر منه يعني بالرغم إن الكارت فيها كرسي للأطفال لكن ميمنعش ياخدولهم إتنين أو ثلاثة علشان الأولاد يجروا بيهم يمين و شمال و مش مشكلة يخبطوا في مين... كل رد الفعل الوحيد بيبقى... تعالي هنا يا حمادة متبعدش عني .. ولا حد يسمع آسفه ولا عيب يا ولد

زمان كان الشعب المصري معتز بثقافته و دينه جدا.... روح أي مول ولا في الشارع حتى هتتغير فكرتك 180 درجة .... ياللا يا (ضارلنج) نتصور إحنا و(الكيضظ) مع (صانتاكلوظ) ... جملة سمعتها في كارفور!!!!

في أو تي في ... بيعرضوا فيلم أميريكان باي وده للي مسمعش عنه فيلم أثار ضجة يوم ما نزل في أمريكا و تصنيفه إنه يحتوي على مشاهد و ألفاظ جنسية بشكل غير طبيعي.... بعدها بكام يوم كان ديفيلز أفوكاتو و فيه لقطة شهيرة ينطبق عليها التصنيف السابق... و بينهم حلقة لتعليم الرقص الشرقي للستات... و كمان لقطات من حياة المشخصاتي (تامر هجرس اللي مش عارفه هما لازقين فيه ليه في كل خبر) و هو بيعوم في البيسين
وكلام كتير عن إن دي سياسة القناة إنها تخاطب الشباب المتوسط!!!!! بلغتهم
أعتقد كمان إن هالة سرحان هتشرف القناة دي برئاستها... لأنها الاولى في هذا المضمار (مجرد توقع) ومتأكده إنه قريب هنلاقي أفلام بورنو بحته بتعرض في القناة دي اللي لا ليها دين ولا مله و ده بمناسبة ... العروسة إياها أم 3000 دولار

زمان كانت والدتي بتقول المشاكل اللي بينك و بين جوزك متطلعش بره أودة النوم
قرأت مدونتين بالنسبة ليا جداد مدونة طهقان و مدونة طهقانة
ممكن تكون الفكرة بالنسبة للبعض لذيذة... بالنسبة لي ده تجاوز للخط الأحمر.. تطورت الأمور لإن الجيران دلوقتي بقوا بيشاركوا المتزوجين مشاكلهم... و المدونتين دول هما التطور الطبيعي للحاجة الساقعة على رأي الإعلان.... يشبه المدونات دي تماما الموضوع اللي كانت واحدة بتكتبه كل أسبوع على موقع عشرينات
(أنا هاوريك يابن الك...... يا خ..... يا م....) جملة سمعت جارتنا (اللي من بحري و إتجوزت رجل أعمال ليبي) بتقولها لجوزها من كام يوم و هما بيتخانقوا ... تمت كتابتها مع الحذف من الرقابة
ولا عزاء للأصول